Quedó ermu'l Premiu Juan Uría

El premiu d'investigación sobre historia y cultura asturianes de mayor prestixu quedó ermu al nun tener los trabayos presentaos calidá abonda al paecer del xuráu

El Xuráu, nel que taben el director xeneral de Promoción Cultural y Política Llingüística, Carlos Madera, la caderalga d'historia del arte Julia Barroso Villar, y la de paleografía Mª Josefa Sanz Fuentes decidió dexar ensin ganador esta XXVI edición del premiu, y anque nel acta reconozse que "tolos trabayos presentaos suponen una gran aportación a la cultura asturiana nengún d'ellos algama la escelencia na investigación que caracteriza esti premiu".

El Juan Uríu ye un prestixosu premiu que caltién l'espíritu asturianista del historiador al que fai alcordanza col so nome, y amás de dedicase esclusivamente a trabayos centraos n'Asturies cuenta ente la so nómina de ganadores con xente como Carlos Rubiera, que ganó la primer edición a primeros de los 80 col so trabayu "La Cultura asturiana: presente y perspectivas" o Xuan Busto Cortina pol so "Catálogo Índice de Romances asturianos". Nun ye la primer vegada nos últimos años que'l xuráu declara ermu'l premiu, y yá nel 2003 el xuráu, mui esixente, declaró tamién nulu'l certame. L'últimu ganador del premiu foi Alfonso Palacios pol so trabayu sobre'l pintor asturianu Luis Fernández.