¿Qué salió en claro?

Acabaron los conceyos del Foru Económicu Mundial de Nueva York y del Foru Social de Porto Alegre. Mientres el conceyu neoyorquín, baxo'l títulu "liderazgu en tiempu dificil, una visión d'un futuru compartíu", afondó na llinia política neolliberal que lleva plantegando dende va unos años, lo más importante de la xunta brasileña ye qu'el movimientu antiglobalizador, dos años dempués del bautismu de mases de Seattle 99 paez que va encadarmando un discursu sólidu. Más allá del aquello folklórico que suel acompañar les movilizaciones contra'l neolliberalismu, Porto Alegre consiguió, en namás dos años, ser un alcuentru de referencia y facese más famosu que'l Forum Económicu Mundial, que tien más de trenta. Más de 50.000 participantes, 600 seminarios y cerca de 2.00 talleres fixeron del II Forum Social un eventu dotáu d'una capacidá d'análisis y xeneración de propuestes como nun se viere hasta agora. Nos webs del Foru y na revista Le Monde Diplomatique puen vese les conclusiones, qu'abarquen una bayura de temátiques demasiao llarga pa falar equí de toos.