¿Qué pasa cola toponimia de Xixón?

Va quince díes, les señales nueves que taben acabante de ponese nes paroquies de Deva y Santurio nel conceyu de Xixón amanecieron entafarraes de pintura y con escritos al favor de la oficialidá y reclamando que se punxere la toponimia n'asturianu. Dende la conceyalía de la zona rural que dirixe Tino Venturo punxeron el gritu en cielo y dixeron qu'aquello yera una agresión y una gamberrada inxustificable en cuantes que, pa más aquello, los topónimos taben bien puestos. Dende l'asociación de vecinos del llugar díxose hasta que se falare cola Academia de la Llingua Asturiana pa asegurar la corrección toponímica, estremu desmentíu pola mesma Academia a esti mediu. La Xunta Pola Defensa de la Llingua Asturiana quier dar la so opinión nesta polémica, que ve como "un exemplu claru de la nefasta política que sigue’l Conceyu de Xixón no que cinca a la llingua asturiana". Pa la Xunta, "los responsables municipales tan provocando una polémica ensin xacíu con apaiciones y declaraciones na prensa dirixíes a intentar tapecer el verdaderu problema de fondu que provoca esti tipu de situaciones".

Y ello ye que la Xunta diz que anque una parte de la toponimia quedó bien puesto, munchos nomes presenten la forma acastellanizada nes señales nueves. Pa la Xunta, "los nomes tradicionales de los distintos llugares tienen que ser los únicos que s'empleguen na retulación", reclamamándo-y la organización al conceyal responsable Tino Venturo que la mesma priesa que tuvo pa poner un mono y retratase llimpiando con aguarrás les señales tachaes, la tenga tamíen pero pa colocar una señalización nueva que respete les denominaciones tradicionales.

La Xunta considera tamién que "si el Conceyu de Xixón siguiere una política coherente nel tema llingüísticu llograríense evitar polémiques como esta que nun ayuden a solucionar el conflictu llingüísticu n’Asturies".