‘Que les nubes espardan la to voz’ ye’l lema emplegáu na Selmana de les Lletres dedicada a Xosé Bolado

|
Cartelu XLIV Selmana de les Lletres Asturianes recortáu

Yá se conoz el programa completu de la XLIV Selmana de les Lletres Asturianes, dedicada a Xosé Bolado. ‘Que les nubes espardan la to voz’ ye’l lema qu’acompaña la imaxe del poeta y críticu lliterariu que nos dexó nel 2021 na cartelería d’una celebración de la nuesa lliteratura que nos va regalar el documental ‘Na firida del cementu. Vida y obra de Xosé Bolado’ y dos llibros conmemorativos.

La inauguración oficial va tener llugar esti tamién en Xixón, nesta ocasión nel salón d’actos del Centru de Cultura Antiguu Institutu, anque nesta ocasión adelántase al vienres al meudía, en concreto’l 28 d’abril, polo que la Selmana va desenvolvese dende esi día hasta’l sábadu 6 de mayu. Va presentase la obra ‘Xosé Bolado. Fálame duce’, editada por Trabe y coordinada por Marta Mori, que recueye “la semblanza que distintos amigos y personalidaes del mundu de la cultura tracen sobre l’autor uviedín, no personal y tamién na aportación que fizo como poeta, como militante sindical y políticu y na so dimensión de críticu y estudiosu de la llingua y de la lliteratura n’asturianu”, apunten dende la Conseyería de Cultura, Política Llingüística y Turismu.

Darréu va estrenase’l documental ‘Na firida del cementu. Vida y obra de Xosé Bolado’, una producción creada y dirixida por Ana Lamela. El segundu llibru conmemorativu, ‘Palabres blanques. Testos d’Historia y Crítica lliteraria (Esbilla)’, con edición de Trea y coordinación tamién de Mori, va presentase al día siguiente al meudía nel Muséu Nicanor Piñole, y consiste nuna compilación de los artículos espublizaos por Bolado na so faceta de críticu lliterariu.

Otra manera, en gallego-asturiano va asoleyase’l cómic ‘Gladius’, del humorista gráficu Ernesto García del Castillo ‘Neto’. Esti títulu y ‘Xosé Bolado. Fálame duce’ son los que se van entregar de baldre con cada merca d’un llibru o discu nes llingües propies del país el vienres 5 de mayu, XLIV Día de les Lletres Asturianes, en cualquiera de les 57 llibreríes participantes.

Poesía y música

El llunes, 1 de mayu, va ser el turnu del espectáculu poéticu musical ‘Flores escontra’l desamparu’, baxo la direición de Lamela, que va facer homenaxe a la obra de Xosé Bolado a les 19 hores nel Teatru de la Llaboral con entrada de baldre. Nél van intervenir Carlos Alba, Laura Cuervo, la sopranu Susana Gudín, la flautista Delia Gutiérrez Aranda y el tiorbista Iván Fernández Prieto.

La llingua del occidente va tener protagonismu al día siguiente con una actu nel Audiorio As Quintas d’A Caridá a les 18.30 hores. Tamién se va recordar a Bolado col recital poéticu ‘Hailas’ cola participación de Conchita Álvarez Lebredo, María José Fraga, Marisa López-Diz y el dúu Mestura, que va encargase de poner la banda sonora al alcuentru.

El públicu infantil va participar el miércoles col musical escolar ‘Historia d’un bosque’ de Nacho Fonseca, que va representase a les 10 y a les 12 hores nel Teatru de la Llaboral cola participación de la OSPA, ente otros. Ésti va repetise, baxo’l nome ‘Conciertu de les Lletres’, al día siguiente a les 19.30 hores, agora abiertu a tol públicu.

Día de les Lletres

El Día de les Lletres Asturianes, vienres, va dase a conocer a los ganadores de los certámenes escolares a les 14 hores. De tarde, fuera de la programación del Gobiernu, l’Academia de la Llingua Asturiana celebra la so Xunta Estraordinaria por esta xornada nel uvieín Teatro Campoamor.

Pa zarrar les actividaes de la gran celebración de la nuesa lliteratura, el sábadu a les 12 hores nel Piñole los poetes más mozos van participar nel alcuentru ‘Fueyes de color infinitu’. El públicu va poder disfrutar de les reflexones y los poemes d’Aida Escudero, María Fernández Abril, Alejandro Fernández-Osorio, María García Díaz, Xaime Martínez y Pablo X. Suárez, y el grupu Tierra y Eco va poner música en direuto.

A la mesma hora, la Xunta pola Defensa de la Llingua Asturiana entama n’Uviéu la manifestación pol Día de les Lletres. La reclamación de la oficialidá ye la demanda d’esta marcha que toma salida de la Estación del Norte (RENFE).

Contador Estadistiques