‘Qué guapo ye querese’, concursu de rellatos curtios pa xente mozo

|
‘Qué guapo ye querese’, concursu de rellatos curtios pa xente mozo

Con motivu del Día Européu de les Llingües presentóse en Xixón el concursu lliterariu ‘Qué guapo ye querese’, destináu a xente mozo y dividíu en dos estayes: de 16 a 18 años y de 19 a 25. Les creaciones van poder presentase hasta’l 17 de payares.

El Conseyu de Mocedá de Xixón y la Oficina de Normalización Llingüística entamen esta iniciativa que se dio a conocer esta mañana na sala de conferencies del Centru de Cultura Antiguu Institutu cola presencia de la direutora de la Fundación Municipal de Cultura, Educación y Universidá Popular, Raquel Huergo, que tuvo acompañada pol presidente del coleutivu mozu, Álvaro Granda, y la responsable del SNL, María Xosé Rodríguez López. L’actu convocóse con motivu del Día Européu de les Llingües, efémeride que tien como oxetivos “alertar a la ciudadanía de la importancia del aprendizax d’idiomes y diversificar la gama de llingües, cola fin d’incrementar el plurillingüismu y la comprensión intelectual; promover la rica diversidá llingüística y cultural d’Europa; o fomentar l’aprendizax permanente d’idiomes dientro y fuera de les escueles”.

‘Qué guapo ye querese’ pretende fomentar l’usu del asturianu ente la mocedá y l’emplegu del mesmu pa falar de too tipu de materies, amás d’averar la lliteratura a la xente mozo y fomentar un bon querer hacia l’idioma o les persones, alloñáu nesti casu últimu del amor románticu tan enraigonáu na nuesa sociedá. Los ganadores de les dos estayes nes que divide’l concursu van recibir los sos premios el 21 de Febreru de 2018, coincidiendo col Día Internacional de la Llingua Materna.

Contador Estadistiques