¿Qué facer con 2.500 tonelaes de galipote?

Yá queda atrás la ponte de la constitución, cuando la marea negra llegó a Asturies, pero ente lo que se pañó d'aquella y lo que sigue llegando cada día, Cogersa yá lleva recoyíes más de 2.500 tonelaes de galipote, faltando entovía por recoyer lo de la gran mancha que ta na vertical del Cabu Peñes y na que tan trabayando los barcos vascos y catalanes. Una de les entrugues que remanecen ensin esclariar ye saber qué va facese con tou esi galipote, que como yá se sabe ye un batulax de productos altamente contaminantes. En Galicia, la Xunta pensó en desfacese del fuel repartiéndolo pa quemalo peles térmiques d'Unión Fenosa, y agora n'Asturies, dende Ecoloxistes n'Acción denuncien que'l Principáu tien plan de llevar tol galipote que vaya recoyendo a quemar na fábrica de cementu que tien Tudela Veguín nel valle d'Aboño, ente Xixón y Carreño. De ser verdá, nun sedría la primer vegada que los potentes fornos de les cementeres valen pa esborriar del mapa aquello que la civilización nun quier ver delantre. L'añu pasáu, cola crisis de les vaques lloques, paises como Francia llevaron a quemar en fábriques de cementos los restos contaminaos de la EEB y los piensos d'orixe animal. Con un índiz d'azufre que perpasa ente'l 200 y el 300% el másimo que permite la UE, el fuel del Prestige pue ser, en casu de llevalo a quemar ellí , axente causante d'una lluvia ácido que vendría a xuntase colos problemes mediuambientales de la rodiada d'Aboño, que lleva sofriendo dende va años a cuenta de los residuos tanto de la fábrica de cementos como de la factoría d'Arcelor (antigua Ensidesa) y de les dos centrales térmiques que tien Hidroeléctrica al llau de la cementera y que l'añu pasáu baltiaron el récord de producción.Dende Ecoloxistes n'Acción esclarien qu'un estáu miembru de la UE pue autorizar que se queme esta clase de galipote, pero ello tien de ser respetando primero les normes comunitaries de calidá del aire, que nun ye'l casu en Aboño en cuantes que les estaciones de control de Fontanía y Monte Areo yá pasen el Valor Tope Diariu de protección de la salú humana, que ta en 125 g/m3. Otramiente, de quemar el galipote soltaríense al aire arsénico y metales pesaos como'l cadmiu y el zinc. La organización ecoloxista pide que nun mande la priesa y que se tenga'l fuel fuel en nun vertederu controláu hasta que se tenga un procedimientu lo menos dañible posible pa quemalo.