Punset animó a los acampaos n’Uviéu con un “nun paréis”

Eduard Punset, mostró na nueche del martes la so solidaridá colos acampaos n’Uviéu. L’escritor y divulgador científicu, que ta na ciudá como xuráu de los Premios Príncipe de Asturias, acudió a la Escandalera y dixo a los indignaos “nun paréis”.

 

Tres llegar a la plaza, el presentador del programa Redes del segundo canal de TVE garró'l micrófonu y tomó la pallabra pa dirixise a lo presentes. “Gracies por caltener viva una esperanza que llevamos cultivando dende hai muncho tiempu”, dixo a los indignaos aconceyaos na Escandalera y comentó-yos qu'hai muncha xente que s'alcuerda d'ellos, anque-yos paeza dacuando que tán solos. Punset comparó'l movimientu del 15M cola Ruta de la Seda d'hai 2.000 años, un trayeutu comercial ente Asia y Europa. “Yera como vosotros. La xente diba y intercambiaba conocimientos, bilordios, infecciones, xenes...Y d'ellí surdía una civilización nueva y una manera de pensar; y neso tais vosotros”, dixo. Tamién refirióse a les numberoses especulaciones relatives a quién ta detrás del movimientu y señaló que cuando les entrugues nun tienen respuesta, la xente suel recurrir a teoríes “cospiratives”.

 

Na so intervención, Punset esplicó a los indignaos que ta n'Uviéu porque “igual pola edá” colóquenlu en xuraos de distintos premios. “Toi nel xuráu de Ciencia del Premio Príncipe de Asturias, creo que se llama. Pasemos tol día debatiendo quién sería'l que ganó'l premiu. Agora tengo que guardar el secretu, pero déxovos tranquilos porque creo qu'escoyimos bien”, comentó.

 

Otra manera, los indignaos de Llangréu fixeron una aición esta mañana contra la banca. Ésta consistió n’entrar en toles sucursales bancaries de Sama per dellos minutos xunto con una pancarta que rezaba ‘Los b€neficios pal pueblu’ y dellos cartelos reivindicatos como ‘Banca ética’, ‘Nacionalizar la banca’, ‘Banca popular’ o ‘Stop privatización de les caxes’, ente otros.