Pumares quier la competencia ferroviaria "p'ameyorar el serviciu y evitar chapuces como la de los trenes" de Feve

El presidente Adrián Barbón pide "compensaciones" al Ministeriu de Tresportes polos errores nel diseñu de los vehículos y afirma que "deben rodar cabeces".

"La chambonada entamada pol Gobiernu d'España, encargando p'Asturies unos trenes que nun caben nos túneles, ye una llamada d'atención nueva pa que'l Principáu asuma d'una vez les competencies en materia ferroviaria", reclama Adrián Pumares, voceru parllamentariu de Foro y candidatu del partíu asturianu a les eleiciones del 28 de mayu. Ye la forma, considera, de "ameyorar el serviciu y evitar chapuces como la de los trenes" de Feve p'Asturies y Cantabria.

El llavianés mostróse mui críticu con Barbón, al qu'acusó de "anteponer los intereses del PSOE a los d'Asturies". "Ye evidente que la rede ferroviaria asturiana ta obsoleta y falta d'inversión dende va munchu tiempu, pero les competencies asúmense nel marcu d'un procesu negociador, onde'l Ministeriu de Tresportes ha aportar una parte de la financiación".

Pal dirixente forista, "esta asunción de competencies, lloñe de ser una llocura o una entelequia, supón una oportunidá p'aumentar los ingresos ameyorando'l serviciu".

El socialista demanda más trenes y más inversión

"Los trenes sí o sí van fabricase y la nuesa esixencia ye que se faiga nel menor plazu posible y que se nos compense a les dos comunidaes, con más trenes, con mayor inversión”, señaló esta mañana, pela so parte, Barbón. Tamién faló de "chapuza" del Gobiernu estatal, señaló que "el ministeriu tien agora un problema de credibilidá y ha tomar decisiones", y afirmó que "deben rodar cabeces".