Pumares emplega l'asturianu nun cachu de la so intervención nel Plenu pol Día d'Asturies

"El Gobiernu del Principáu d'Asturies tien la obligación de garantizar que la celebración de Cuadonga 2022 dexe alcordances perdurables", reclamó'l diputáu de Foro.

La Xunta Xeneral ta acoyendo'l Plenu institucional pol Día d'Asturies na viéspora del 8 de setiembre. Adrián Pumares, voceru de la formación asturiana, emplegó l'idioma nun cachu del so discursu, que dedicó al decimotercer centenariu de la fecha na que se marca la celebración de la batalla de Cuadonga, l'añu 722.

"Nun tenemos d'escaecer que'l añu que vien va tener llugar el XIII Centenariu de Cuadonga, Cuadonga 2022, y el Gobiernu asturianu nun pue repitir los fracasos de los trés centenarios qu'Asturies conmemoró ensin pena nin gloria nel añu 2018. Tenemos la obligación d'aprovechar esta nueva oportunidá histórica de proyectar la imaxe d'Asturies, asitiándonos nel centru d'atención cultural y hestóricu, pero tamién turísticu. El Gobiernu del Principáu d'Asturies tien la obligación de garantizar que la celebración de Cuadonga 2022 dexe alcordances perdurables a les siguientes xeneraciones, al empar que fortalez la imaxe d'Asturies a tolos niveles", señaló Pumares dende la tribuna d'oradores.

Nel restu de la so intervención, yá en castellanu, el voceru de Foro rescampló que'l "primer gran retu al que'l Principáu ha facer frente ye garantizar que la nuesa sanidad y la nuesa educación vuelvan tener unes condiciones muncho meyores que les actuales". Criticó l'abandonu de la industria "énte una transición enerxética que más qu'una transición paez una apisonadora" y llamentó que'l país nuna tenga "una voz firme en Madrid que defenda los intereses d'Asturies n'asuntos clave como'l modelu de financiación autonómica", centrando darréu gran parte del so discursu nel drama de la emigración de la mocedá asturiano y l'altu paru xuvenil.