Pulgar: “Ye tiempu de cumplir la llei y facer pola normalidá del idioma”

La Xunta pola Defensa de la Llingua Asturiana fixo entrega del pegollu de los XXVII Premios Andrés Solar a los responsables del vinu Ḷḷumés. El so voceru, Carlos Pulgar, señaló que “ye tiempu de cumplir la llei y facer pola normalidá del idioma”.
 
El Centru de Cultura Antiguu Institutu acoyó l’actu d’entrega de los premios que lleven el nome del escritor de Deva, eventu qu’aconceyó a numberosu públicu. Naciu Varillas foi l’encargáu de presentar esta ceremonia que, como ye vezu, contó cola presencia de familiares de Solar. Tres un introducción breve de Varillas, Iris Díaz Trancho, secretaria del xuráu encargáu de decidir les persones o entidaes merecedoras de los dos gallardones que componen los premios, destacando’l consensu pa otorgar el madreñazu d’esta edición a César Movilla Anta, alcalde de Noreña, “pola so actitú repetida de rechazu al usu de la llingua asturiana nel ámbitu de la so competencia, vulnerando d’esta manera tanto los derechos de la ciudadanía xeneral como la de los sos llexítimos representantes democráticos”. Al nun apaecer el premiáu, como ye habitual nesti gallardón, Varillas señaló que los miembros de la XDLA van facer por unvialu a la Casa Conceyu de Noreña.
 
Díaz Trancho tamién s’encargó de lleer l’acta del pegollu, el premiu positivu de los Andrés Solar, qu’esti añu foi pa la familia Marcos, responsables de la ellaboración del vinu Ḷḷumés, el primeru de Cangas en tar etiquetáu n’asturianu. “La visibilización social del idioma nun sector clave y la recuperación de la toponimia asturiana son dalgunes de les razones poles que se dan esti premiu. Pol so apueste decidíu, ensin complexos, y pol so exemplu de que l’asturianu nun ye un llastre, sinón daqué que xuega al nuestru favor”, afirmó.
 
David Marcos y Enrique García xubieron a recoyer el premiu de manes de Lali Solar, hermana d’Andrés, énte l’aplausu del públicu y los flashes de la prensa gráfica qu’acudió a cubrir l’actu. Na so intervención, Marcos, viticultor de Bodegas Obanca y responsable de la creación del Ḷḷumés, contó la historia breve d’un vinu que se xestó una nueche de San Xuan y que tuvo dellos problemes nunos primeros momentos pola normativa del Gobienu qu’obliga a etiquetar en billingüe. “Yo aposté por facer un vinu n’asturianu y decidí nun cambiar la etiqueta porque nun son pallabres rares, sinón asturianes”, señaló Marcos. La so decisión foi tamién acertada no comercial, yá que consiguió vender tola producción d’un vinu que tien demanda grande dientro y fuera de les nueses llendes.
 
Tres la entrega de premios, llegó’l turnu de la llectura del discursu de la XDLA. Pulgar, siguiendo la llinia del comunicáu asoleyáu pol coleutivu a los 100 díes de la constitución del Gobiernu, criticó l’ausencia “de cambios reales” no que respeuta a la política llingüística. “Ye tiempu pa pensar, cumplir la llei y facer pola normalidá de la llingua en tolos aspeutos”, reclamó, ensin escacer facer referencia a la “oficialidá” del idioma.
 
Darréu, fixo un análisis de los dos premiaos, entamando pol madreñazu de Movilla, “ganáu a pulsu”. “Un alcalde ta pa servir, non pa poner estorbos”, señaló en referencia a la negativa a tramitar les mociones n’asturianu presentaes por Pablo Pérez, edil de Conceyu Abiertu por Noreña. Otra manera, no que respeuta al pegollu, eloxó “l’apuesta pola visibilización del asturianu” de la familia Marcos tres facer un repasu de la historia del Vinu de Calidá de Cangas y analizar la importancia de la decisión de Bodegas Obanca de etiquetar n’asturianu. Nesta parte última, Pulgar utilizó la variante occidental del nuesu idioma en deferencia a los premiaos. Pa zarrar l’actu, tuvo llugar l’actuación músical de Pedru y Tania Pereira, duu de Xedré.
 
Xornaes de meses-taller pol decimoquintu aniversariu del Llibru Blancu
 
La XDLA anunció la celebración d’unes xornaes de meses-taller entitulaes ‘15 años del Llibru Blancu: revisión y actualización de la política llingüística’ pa los meses de xineru y febreru. Va constar de cuatro sesiones, ún d’elles y en Xixón y les otres trés n’Uviéu, siendo la primera’l día 19 nel Antiguu Institutu baxo’l nome ‘Enseñanza: de la presencia a la normalización’. Ésta va tar moderada por Xosé Candel y va contar cola presencia de Xosé Antón González Riaño, Beatriz Quirós, Paz Fonticiella y Iris Díaz.
 
Yá nel campus del Mián, el 1 de febreru va falase de ‘Medios de comunicación na sociedá de la información’, mesa na que van intervenir Naciu Varilla, Ana Vanessa Gutiérrez, Próspero Morán y Cristóbal Ruitiña, cola moderación de Rubén Ardura.
 
Mentes, el 15 de febreru, va celebrase la mesa ‘Hacia la consolidación de los Servicios de Normalización Llingüística’, coles intervenciones de Penélope Miranda, María Xosé Rodríguez, Adolfo Camilo y Esteban Intrialgo, encargándose de la moderación, Rubén Ardura. Por últimos, el 29 de febreru, Carlos Pulgar, Ramón d’Andrés y David Guardado van falar de la ‘Recuperación y normalización llingüística d’Asturies’. Nesta ocasión, va moderar Llucía Menéndez.  

 
Na semeya, Enrique García, David Marcos y Lali Solar.