Puesta en marcha una iniciativa pa facilitar el tresporte públicu nes zones rurales

El proyectu Optibús Rural va entamar el 1 d’agostu con una esperiencia pilotu de 18 rutes en 27 conceyos.

El Gobiernu del Principáu, al traviés de la Conseyería d'Infraestructures, Ordenación del Territoriu y Mediu Ambiente, va poner en marcha'l 1 d'agostu'l proyectu Optibús Rural, una iniciativa pionera n'España, xestionada pol Consorciu de Tresportes d'Asturies (CTA), que tien como oxetivu facer posible l'usu del tresporte públicu nel ámbitu rural. Nesta primer edición el proyectu va tener calter d'esperiencia pilotu, polo que se va aplicar en 27 conceyos al traviés de 18 rutes. L'analís de los resultaos va sirvir pa diseñar la futura espansión del sistema.

La iniciativa foi presentada güei n'Uviéu pola conseyera d'Infraestructures, Ordenación del Territoriu y Mediu Ambiente, Belén Fernández, y el director del CTA, Carlos González.

Optibús Rural ye una estensión del proyectu Optibús, empecipiáu n'Asturies n'avientu de 2009 coles mires de que les places llibres de los tresportes escolares nel ámbitu rural puedan ser utilizaes por tola población. De magar, esti proyectu, tamién pioneru nel so momentu, punxo a disposición de los habitantes del mediu rural unes 900 rutes y esperimentó una evolución mui positiva, al pasar de los 40.000 usuarios del primer cursu escolar nel que s'implantó a los casi 200.000 del postreru. Hasta la fecha, más de 700.000 usuarios beneficiáronse d'esti serviciu.

A partir del 1 d'agostu y hasta el 7 de setiembre, en 17 de les rutes daráse serviciu un día a la selmana, que va coincidir col de mercáu. Amás, la de Mieres-Olloniego pol Padrún, con tresbordu escontra y dende Uviéu, va funcionar de llunes a vienres en díes llaborables.

Ta prevista una espedición d'ida y vuelta na mañana, con horarios xeneralmente de salida nun sentíu a les 9 y de torna a les 13:30 hores. Les tarifes van ser les equivalentes a la del serviciu regular; na mayoría de los casos la tarifa mínima (1,50 euros) y billete únicu d'una zona (0,90 euros cada trayectu col bonu 10), anque'l preciu va depender de les distancies.

“Ye importante resaltar que, amás de facilitar l'accesu a les cabeceres comarcales o poblaciones onde se celebra'l mercáu, los trayectos tamién van poder ser utilizaos p'aportar al centru de salú o hospital, polo que se cuenta cola cooperación de la Conseyería de Sanidá pal espardimientu de les rutes”, esplicó Belén Fernández.

La conseyera dirixóse a los conceyos implicaos nesti proyectu pilotu pa que contribuyan al espardimientu del serviciu, col enfotu de que va facilitar en bona midida la movilidá de los vecinos del mediu rural.