Publicaciones Ámbitu cesa na so actividá discográfica y editorial

Tres 16 años de vida, Publicaciones Ámbitu echa’l zarru por motivos económicos. La empresa fundadora del históricu selmanariu Les Noticies –que mantenía tovía la so edición dixital– cesa na so actividá discográfica y editorial.

Una entrevista a Mariluz Cristóbal Caunedo, espublizada güei, trátase del artículu caberu de la web que nació como complementu al únicu periódicu esistente en llingua asturiana, que se caltenía activa a pesar del zarru de la edición impresa a primeros d’esti añu. Agora, Les Noticies desapaez como mediu de comunicación tres la decisión de Publicaciones Ámbitu de cesar tola so actividá discográfica y editorial. Una noticia permala pal país y pa la cultura asturiana provocada pola situación económica actual, con un descensu importante de los ingresos por publicidá, y polos recortes a les ayudes al asturianu.

Nuna nota espublizada ayeri na edición dixital de Les Noticies, Ámbitu esplicaba a los sos llectores les razones de la decisión de la empresa creada y dirixida por Inaciu Iglesias, que tamién escribió un editorial baxo’l títulu de ‘Valió la pena’. Pese a l’anuncia de zarru, la editorial va editar en feches próximes dellos llibros que taben dientro de la so planificación y va continuar cola venta de los sos fondos editoriales en llibreríes y tiendes de discos. Tovía la selmana pasada, Ámbitu presentaba un discu conxuntu de Xuan Nel Expósito, Mapi Quintana, Marta Arbas y Anabel Santiago entituláu ‘Aire’. Ésti trátase d’un trabayu de música tradicional non al usu: un álbum dedicáu a l’acordión diatónica con diez cantares nel que tán presentes ritmos fundamentales de la tradición astur, como el son d’arriba, la muñeira, la xota, la danza y la tonada, que s’interpreten como nunca enantes se fixera.