PSOE y PP engárrense pol proyectu del "AVE del cantábricu"

Los proyectos pa hipotétiques infraestructures a desarrollar nun futuru centren estos díes l'enfrentamientu políticu ente les principales formaciones asturianes, dempués de la negativa de la FSA a un posible tren d'alta velocidá que recorriere tola costa cantábrica pol dañible impactu ambiental que diba tener el trazáu sobre la costa asturiana, pela que trescurre actualmente un trazáu de vía estrecha que nin siquier da un serviciu de cercaníes con unes condiciones mínimes.

El presidente del PP d'Asturies, Ovidio Sánchez, calificó la postura del PSOE respecto al AVE del Cantábricu como "l'acabose del disparate" y aseguró que los socialistes, refugando esta infraestructura "pretenden que los asturianos pierdan el tren de les oportunidaes".

Sánchez insistió en que ye un disparate decir qu'a los asturianos nun-yos fai falta l'AVE del Cantábricu porque-yos sirve FEVE. "¿Cómo se pue decir qu'un tren de vía estrecha ye l'alternativa a l'alta velocidá?; esti disparate ye lo que define la posición del partíu socialista", dixo Sánchez. El popular recordó amás qu'esta infraestructura foi un compromisu del Gobiernu d'Aznar colos ministros Mariano Rajoy y Álvarez Cascos, y destacó que ye "mui curioso" que'l Principáu seya la única comunidá que s'opón al AVE, mientres Cantabria, Galicia y País Vascu lo reclamen.

El cabezaleru del PP afirmó que los socialistes aleguen l'impactu medioambiental, cuando pel momentu "tovía nun existe nengún estudiu" y que "faen el trabayu gochu pa que Zapatero nun tenga nengún compromisu nuevu nin inversión".

Sánchez rellacionó l'asuntu del AVE cantábricu col "desfase nes inversiones d'El Musel", una obra que va encarecese en 50.000 millones de pestes y que va tener consecuencies nos presupuestos del Ministeriu de Fomentu.

Frente a esta posición "vieya y tresnochada" del PSOE el PP aseguró que se compromete con Asturies y con esta "importante infraestructura". Asina, Sánchez indicó que va defender esta obra na Xunta, como proposiones non de llei, y nel Congresu y el Senáu. De la mesma manera, manifestó que nel programa electoral del PP va constar esti compromisu.

Dixo amás que "llueve sobre moyáu" y comparó la postura del PSOE col AVE cola caltenida respecto a la Variante del Payares.