PSOE y IX refugaron aparar el derribu de la térmica d’Avilés

El Conceyu d'Avilés refugó colos votos de PSOE y d'IX-BA, la paralización del derribu de l'antigua central térmica d'Ensidesa, como pidíen los grupos del PP y ASIA, qu'esixeron la celebración d'un plenu estraordinariu sobre la cuestión.

PSOE y IX-BA, que sumen 12 votos polos 9 de PP y ASIA, ficieron valir la so mayoría pa refugar la doble propuesta de la oposición, que pidía que se retirase la llicencia pal derribu y que s'entamaren midíes pa la so rehabilitación cultural.

L'equipu de gobiernu cargó nel debate contra los conceyales del PP que nel so día defendieren el derribu del históricu edificiu de la térmica pa que se contruyere nel sitiu una central de ciclu combináu. El portavoz d'IX José Fernando Díaz Rañón entrugó-yos a los populares por qué nun presentaren una propuesta alternativa de recuperación del edificiu con más tiempu y llegó a acusar al PP de favoritismu a familiares por defender nel so día'l proyectu de ciclu combináu d'Isolux. Al plenu asistieron representantes de la plataforma cívica que pidía la conservación de la térmica.