PSOE y IU aprueben los presupuestos y la reforma de la Función Pública

Los socios de gobiernu, PSOE y IU, aprobaron esti martes nel plenu de la Xunta Xeneral los presupuestos pal 2011 y la reforma de la Llei de Función Pública. Bloque y PP refugaron la decisión y tacharon la reforma de “inconstitucional”.

Sobre la reforma de la Llei de Función Pública, PSOE y IU unieron los sos votos para rechazar les 14 enmiendes presentaes pol Partíu Popular al un proyectu rechazáu polos sindicatos y que’l PP y Bloque por Asturies calificaron d’inconstitucional.

El diputáu del PP, Ramón García Cañal, señaló que’l proyectu carez de llexitimidá, ye arbitrariu y contrariu a los principios del Estatutu Básicu del Empleáu Públicu (EBEP). “Quier evitar les numberoses sentencies dictaes polos tribunales”, dixo Cañal, que criticó que “los grupos parlamentarios del PSOE y IU fixeran lo que nun s’atrevía a facer el gobiernu por ser escandaloso abondo con un nuevu cambiu nel proyectu”.

"La tramitación parlamentaria escondía un últimu golpe de mano de lo que de verdá se pretende con esti proyectu, incluyendo una enmienda de cambéu que'l so fin ye igualar la esperiencia adquirida en puestos ocupaos internamente, en adscripción provisional o en comisión de serviciu, ye dicir a deu, cola llograda en puestos ocupaos en propiedá o con calter definitivu", esplicó Cañal.
  
Amás, García Cañal recordó que'l proyectu nun cunta col sofitu de los representantes de el trabayadores y que demuestra la incapacidá" del Gobiernu p'acometer la regulación xeneral que precisa la función pública nel Principáu d'Asturies. García Cañal alvirtió que'l proyectu establez una enumeración de puestos que van ser de llibre designación, "condicionando a futuros gobiernos la organización de la estructura de la so alministración".

Crítiques del Bloque
El diputáu del Grupu Mestu, Roberto Colunga, tamién criticó con contundencia’l proyectu. Según l’asturianista, l’aprobación del proyectu de Llei trata de burlar les sentencies xudiciales, fomenta'l clientelismu y convierte en norma l'usu y l'abusu de la llibre designación asitiando amás al funcionariu públicu sol control partidista.

El Bloque por Asturies tamién criticó qu’una enmienda de PSOE y IU-Verdes presentada y aprobada na ponencia quier “manipular los concursos de méritos”. D’esti mou, según el BA, na práctica “espardiríase’l sistema deucráticu de nomamientos a tolos puestos singularizados: secciones, negociaos y familiares”.

Colunga llamentó tamién que “volviera a perdese la oportunidá de reforzar los mecanismos de méritu y igualdá nel accesu y carrera dientru de l´Alministración pública y una evaluación oxetiva de la nuestra alministración y trabayadores públicos” y sorrayó la inconstitucionalidá de la medida, a lo que añadió que van llevar el proyectu de Llei al Tribunal Constitucional “si les posibilidaes lo permiten”.

“Va colocase al funcionariu públicu baxu’l control partidista. De xuru que tán encantaos, que tán frotando les manes, tolos especuladores de cualisquier tipu, tolos traficantes d´influencies, tolos lobbys, a los que se-yos abre un mundu de posibilidaes y que van tar encantaos con funcionarios públicos nuna posición de debilidá, que nun tean nes condiciones oxetives d’imparcialidá necesaries”, acabó Colunga na so intervención.

Xustificación de la llei
Por contra la diputada del grupu socialista, Servanda García, refugó toles crítiques y destacó que la Llei nun dexa dulda dalguna sobre'l respetu de los principios básicos d'igualdá, capacidá y méritos.
  
García indicó que les intervenciones de PP y del Grupu Mistu fueron "fusilaes" de les intervenciones de dellos sindicatos y pidió-yos más "responsabilidá de trabayu" recordándo-yos que son políticos y non "funcionarios".
 
"Nun me paez nin lóxicu nin razonable qu'ustedes falen d'esa manera y que traten d'acusanos de corruptos equí na Cámara", dixo Servanda García.
  
La diputada d'IU-Verdes, Diana Camafeita, indicó que lo que plantega la enmienda "tan criticáu" namás reflexa la defensa de que se valore d'igual manera'l trabayu desenvueltu por cualesquier funcionariu, polo que "arriquez el testu alcordáu".
  
Camafeita acusó amás a PP y BA de siguir "instaláu na demagoxa" y calificó de "desfachatez" que'l Grupu Mestu nun presentara nin una sola enmienda ya inclusive punxo en dulda que dichu grupu lleérase'l proyectu de llei.

Presupuestu
Per otru llau, PSOE y IU-Verdes tamién aprobaron esti martes los Presupuestos pal próximu exerciciu 2011, colos votos en contra del PP y del Bloque por Asturies.
 
Los dos grupos que sofiten el gobiernu -PSOE ya IU- tamién unieron los sos votos pa refugar la totalidá de les enmiendes presentaes polos 'populares', un total de 86 que trataben de correxir "unes cuentes que más que la solución son una causa más de la crisis".
  
D'esta miente el Parlamentu dio güei lluz verde a unes cuentes que según defendió la pasada selmana na Cámara'l Gobiernu, tienen como prioridá'l caltenimientu de los servicios públicos esenciales, amás d'un impulsu a la inversión y la sostenibilidá de les cuentes públiques. El proyectu xube a 4.133 millones d'euros y 1.070 correspuenden a inversión.
  
Los diputaos del grupu parlamentariu del PP, Ana Barrientos y Joaquín Aréstegui, fueron los encargaos de defender les enmiendes del so grupu. Mientres les sos intervenciones manifestaron que discrepen no fondero y na forma del presupuestu presentáu pol Gobiernu.
 
 "Esti presupuestu ye igual del gobiernu del que surde: agónicu, arruináu pola crisis ya incapaz de salir de la mesma", dixo Aréstegui, qu'indicó que'l PSOE llevó al Principáu a ser el vagón de cola en tou. "Son incapaces d'atopar una salida a la crisis, son el campeones d'evitar decisiones eficaces, tán empiorando'l camín", añedió.
 
 Asina indicó que'l Presupuestu "da una en clavu y otra na ferradura, pon arreces a la cangrena y va ser una más de les causes de la crisis", tou ello al so xuiciu siguiendo l'exemplu del Gobiernu central. Por tou ello indicaron que "ye imposible tar acordies con les cuentes".
  
Criticaron tamién dalgunes de les midíes concretes de les cuentes les elevaes xubíes del canon de saneamientu y l'altu preciu de l'agua nel Principáu. Nesti sentíu Barrientos indicó que la xubida del canon va destinada a pagarla.

Nesta ocasión, el grupu parlamentariu del PP presentó un total de 86 enmiendes parciales al proyectu de llei de presupuestos xenerales pa 2011, de les que 65 son relatives al estáu numbéricu de les cuentes rexonales, otres 14 al testu articuláu y siete más a la llei de midíes d'acompañamientu.
 
Dientro de les primeres enmárcase la propuesta d'incluyir una partida de 32,5 millones d'euros p'ayudes a empreses con potencial competitivu esaniciando la medría del sector públicu, un amenorgamientu de 14,5 millones de gastos nel ente de comunicación pa destinalo a ayudes a los conceyos pa regularizar los pagos a provisores, la inclusión de 1,1 millones pal Centru Rexonal de Belles Artes o 500.000 euros pal plan director d'obres de la Catedral d'Uviéu.
  
D'ente les enmiendes a la Llei d'Acompañamientu, destaquen tamién la supresión de toos les medríes tributaries recoyíos nos presupuestos de 2011, una rebaxa d'escala del IRPF a los asturianos con rentes baxes y la supresión de cualquier clase d'aportación del Principáu a la concesionaria del AS-II que xune Uviéu con Xixón.
  
El diputáu socialista, Álvaro Álvarez, indicó que'l PP "si demuestra tar fuera de la realidá al culpar al gobiernu d'España de ser el causante de la crisis financiera internacional" y llamentó que la posición de los 'populares' nun sía otra que tratar d'enfear al Gobiernu. "Toles enmiendes que presenten ignoren la situación de la economía del país", dixo.
  
La tamién diputada socialista, Elena Díaz Palaciu, indicó que'l PP presenta "les mesmes enmiendes al testu articuláu que tolos años" buscando esaniciar toes los "pequenos cambeos que traten de llograr una xestión más eficaz y axilosa del presupuestu".    
Llamentó tamién que'l PP tenga siempres les sos besties negres", como'l casu de la televisión pública del Principáu y criticó que se propongan proyectos pa los que nun hai demanda y sicasí propóngase suprimir otros necesarios.
  
El diputáu d'IX Verdes, Jesús Iglesias, consideró "lóxicu y normal" que'l PP discrepe de les cuentes que presenta'l Principáu, porque "nunca compartió esa orientación política". "El PP nun vien a esti plenu bien fuerte nin entusiasmáu y parace foliáu, a xulgar pol númberu d'enmiendes presentaes bien inferior al que nos tien avezaos", dixo Iglesias.
  
Pela so parte, el diputáu de Bloque per Asturies, Roberto Colunga, calificó les enmiendes del PP como "una carta a los Reis Magos" y añedió que pal so grupu nun hai posibilidá de presentar enmiendes concretes porque son unes cuentes qu'Asturies nun precisa nesti momentu, que nun va sirvir p'atayar la crisis y muncho menos dende la esquierda.