PSOE, PP y IX rechacen la comparecencia del conseyeru de Salú

La Comisión de Salú del Principáu d’Asturies rechazó por unanimidá la comparecencia del conseyeru de Salú. La petición foi del Bloque por Asturies pa que s’esclariaren asuntos sobre’l dispositivu de Rayos X de Llanes.

El pasáu 5 d’ochobre’l Bloque por Asturies, a propuesta de l’Asociación de Vecinos y Vecines de Celoriu “La Hoguera”, pidió la comparecencia del conseyeru de Salú, Ramón Quirós, pa que informara “con tolos detalles” de la situación y el non furrulamientu del dispositivu de Rayos X instaláu nel Centru de Salú de Llanes.

Sicasí, la Comisión de Salú y Servicios Sanitarios - formada por PSOE, PP y IX- refugó por unanimidá l’asistencia y comparecencia del conseyeru de Salú. Dende l’Asociación de Vecinos califiquen la decisión de “llamentable” y opinen que ye porque “quiciabes nun se quier nin se pue contestar coherentemente, sensantamente y con argumetos de pesu”.

“Llamentamos qu’estos grupos políticos seyan incapaces de ver la necesidá que planteamos, que den la espalda a la realidá de les necesidaes de la población y que la so falta de sensibilidá cola xente seya tan palpable y insolidaria”, denuncia “La Hoguera” en rellación a la postura unánime de los partíos mayoritarios.

Necesidá del sistema
“Dalguien ye’l responsable de que faiga 17 años que s’instaló la máquina de Rayos X de Llanes, que nun se punxera enxamás en serviciu y que siga ensin tarlo”, denuncien los vecinos de Celoriu. Pa ellos ye necesariu habilitar el sistema, ente otres coses, porque’l más cercanu tan nel Hospital de Les Arriondes, con un serviciu de tresporte públicu “mui probe y precariu, con difícil accesu pa munchos pueblos”.

“Habilitar el serviciu de Rayos X de Llanes amás de significar una atención sanitaria más rápida, eficaz y económica, ye un pasu más hacia la compensación que supón la discriminación que sufrimos nel Oriente y que queremos solucionar na midía que se puea”, sentencia l’Asociación de Vecinos.