'Proyectu webserie': ficción en llingua asturiana n'Internet

Tolos domingos a les 21.30 hores va estrenase un capítulu de 5 minutos.

Xurde y Adriana son dos rapazos que s’embarquen nun proyectu web d’entretenimientu xunto a Oliver, un actor mozu y youtuber un pocoñín curtiu d’entendederes. El problema qu'atopen ye que nun tienen nenguna idea que-yos convenza, dalgo que cambia cuando, de casualidá, Xurde s’atopa con Ayalga, una camarera aspirante a actriz de la que lleva namoráu dende cuantayá, a la que-y ufre participar nuna webserie ensin tener nada planiao entá.

Ésti ye l'argumentu de 'Proyecto webserie', una producción de Cuatro Gotes, sofitáu pola Oficina de Normalización Llingüística de Xixón, con guión y dirección del mozu realizador Marcos S.L., con Bea Canteli, Olaya Pena, Pablo Mare y Sergio Ordoñez como protagonistes. Trátase d'una apueste por da-y conteníos n’asturianu de ficción a la mocedá, que nestos tiempos avecen a consumir más al traviés de plataformes de conteníos na rede que pel modelu tradicional de televisión.

Esti domingu pasáu estrenóse'l primer capítulu d'una serie que va tar compuesta por 8 nesta primer temporada. Cada domingu, a les 21.30 hores, va xubise ún nuevu a la web de PlayPresta y a los sos canales en Facebook y YouTube.

Actu de presentación en Xixón

Tres entamar un preestrenu en Bimenes y Villaviciosa, esta tarde nel Atenéu Obreru de Xixón va facese una presentación del proyeutu. Va ser a les 19.30 hores y nella van participar el direutor y los actores de la serie.