Proyectos de cooperación con Bosnia y Nicaragua

L'Axencia Asturiana de Cooperación al Desarrollu entamó'l so llabor nesta llexislatura col viaxe oficial del so director Rafael Palacios a Bosnia Hercegovina

Nel viaxe, que duró del 9 al 21 de setiembre, palacios entrevistóse con representantes institucionales, políticos y sociales del canton de Unsko-Sansko, de los municipios de Cazin y Kljuc, amás d'un alcuentru con representantes de l'Axencia Española de Cooperación Internacional na Embaxada española en Sarajevo. La estancia valió tamién pa conocer el desarrollu de dellos proyectos de cooperación en que participa l'Axencia y la posible participación n'otros nuevos, ente ellos los proyectos del distritu escolar de Coralici, onde la escuela nueva de Primaria de Mutnik ta faciéndose cola ayuda del Ayuntamientu de Llangréu. L'axencia entrevistóse tamién coles families de los rapacinos de la zona que lleven viniendo a Asturies dende va dellos veranos p'acá.



L'Axencia tamién tuvo contactos la otra selmana col alcalde de Puerto Morazán (Nicaragua) pa comentar dellos proyectos de cooperación, apautándose'l calandariu pa la inauguración de dos proyectos de cooperación en Nicaragua y El Salvador. El primeru d'ellos ye la construcción y equipamientu del "Centru de Salú Municipal Asturies" en Puerto Morazán, ciudá de 13.000 habitantes del departamentu nicaragüense de Chinandenga. El segundu proyectu consiste na construcción de viviendes y infraestructures para la población desplazao pola guerra en Nejapa (El Salvador).