Proyección documental sobre l'últimu galocheiro de Grandas

La 'Asociación de Amigos del Museo Etnográfico de Grandas de Salime' presenta'l sábadu 11 d'agostu na Casa de Cultura de la localidá 'Memorias da Nosa Terra', proyectu desenvueltu en collaboración col Muséu Etnográficu de Grandas coles mires d'arrexuntar, caltener y espublizar la memoria de los mayores del conceyu.

Nesta primer entrega, sol lema 'Traballos esqueicidos' va proxectase'l testimoniu de José Blanco Álvarez (Teixeira, Grandas de Salime, 1931), postreru representante na contorna de los artesanos fabricantes de 'galochas' o madreñes. Al traviés de les sos alcordances, José Blanco trespórtanos a una dómina na que les madreñes yeren el calzáu habitual na contorna y avéranos a los pormenores d'un oficiu, güei prácticamente desaniciáu, qu'él aprendió siendo bien mozu del so padre y que desenvolvió hasta los años 60 del pasáu sieglu xunto colos trabayos del campu.

La presentación va entamar a les 17:30 y va cuntar cola intervención d'Alfonso Fernández Canteli, Catedráticu de Teoría d'Estructures de la Universidá d'Uviéu y gran conocedor de too lo relativo a galochas y madreñes, pieces que lleva años coleccionando ya investigando. Tres la proyección, los asistentes que lu deseyen van poder asistir a una visita empuesta na sala de madreñes del Muséu Etnográficu de Grandas de Salime.