Protestes pol casu del maestru al qu'Educación-y refugó un escritu n'asturianu

El casu de Xosé Nel Comba Paz, el maestru al qu'Educación refugare un escritu d'itinerancies redactau n'asturianu, que recibió de vuelta retocáu a bolígrafu en castellanu sobre'l testu orixinal en castellanu polos funcionarios del serviciu de xestión económica, llevantó una rabasera de protestes dende entidaes comprometíes cola normalización del asturianu.

Énte una situación que s'asemeya enforma a la del lletráu Xurde Blanco, al que se-y refugare un permisu pa dir a operase por tar redactáu n'asturianu, el casu de Xosé Nel Comba llama más l'atención en cuantes que la sida oficial pa refugar el documentu ye qu'esti nun se fexere nos impresos oficiales disponibles a estos efectos, una práctica que s'aveza muncho ente'l colectivu docente ensin qu'hasta agora se dieren mayores problemes por ello.

La Xunta pola Defensa de la Llingua sorraya esti fechu, que califica de "broma de mal gustu" y sorraya lo "irregular que paez qu'un documentu que nun s'almite a tramitación se devuelva con correcciones a bolígrafu feches por tar el testu redactáu n'asturianu". Estes correcciones nel escritu, feches del asturianu al castellanu, "como si se tratare d'errores nun examen" llamen muncho l'atención de la Xunta pola Defensa de la Llingua, que denuncia qu'estos fechos "faen rescamplar el cinismu y la hipocresía d'unos responsables de gobiernu qu'afirmen énte la opinión pública'l so apoyu a la promoción y protección de la llingua asturiana, al tiempu qu'actuen sistemáticamente en sentíu contrariu". Pa la Xunta, actuaciones como esta demuestren que'l Gobiernu asturianu "anecia en xenerar un conflictu onde nun debería habelu y en demostrar, otra vuelta más, la so voluntá implacable d'acabar cola llingua asturiana pela vía de la prohibición y la marxinación".



L'Asociación de Trabayadores de la Normalización Llingüística emitió tamién un comunicáu de protesta en que denuncia la "falta de voluntá política y la violación de los derechos llingüísticos de los falantes d'asturianu" que representa la devolución del escritu, y asegura que "la Conseyería d'Educación, igual que'l restu de conseyeríes, tendría que disponer d'un serviciu de normalización llingüística que sirviera pa equiparar los derechos de tolos trabayadores y usuarios independientemente de la llingua qu'usen" acusando al conseyeru Riopedre de "volver a violar los derechos d'un trabayador por usar l'asturianu y practicar l'apartheid llingüísticu".