Protesta de SUATEA n’Uviéu contra la Llei d’Educación

El sindicatu d'enseñanza describe la Llei d'Enseñanza del gobiernu español como "un pautu políticu a costa de la calidá del enseñu públicu y contra'l profesoráu" y llama a una concentración de profesoráu que va tener llugar güei xueves a les 18:00h na plaza d'España d'Uviéu como antoxana a una fuelga del profesoráu convocada pal día 14 d'avientu, día en que'l sindicatu va facer una manifestación contra la LOE que va salir de la estación de la RENFE d'Uviéu a les 6 de la tarde.

La central asturiana d'educaciónSUATEA y la federación de sindicatos d'enseñanza STES na que s'enxerta nun aforren en calificativos negativos pa col proyectu de Llei d'Enseñanza (LOE) que defende'l Gobiernu español y que cuenta yá col sofitu mayoritariu de los partíos en Congresu. SUATEA diz que la LOE "pretende solucionar los problemes d'escolarización cola xuba de ratios nes aules de centros públicos y concertaos, sabiendo que les ratios altes son un elementu que va claramente contra la calidá de la enseñanza". El sindicatu nun ye a entender que se consientan ratios tan altes d'alumnos per clase como en tiempu de la LOGSE "cuando l'alumnáu agora ye mucho más variáu y con munchos más problemes" una midida que SUATEA cree que pue llevar al pieslle "de decenes d'unidaes na enseñanza asturiana".

No tocante a la situación llaboral del profesoráu SUATEA denuncia que la LOE nun va cumplir colo que prometíere'l PSOE nel so programa electoral no tocante a incentivos salariales, mengua d'hores llectives dende los 55 años en p'alantre o sobre la elección democrática de los cargos directivos de los centros. El marcu d'accesu a la función docente, pal que SUATEA defendía que se fexere un accesu estremáu pa los interinos, tampoco nun meyora respective a la situación anterior, al paecer del sindicatu que convoca la manifestación pa esta tarde.

Otru de los puntos que más condena SUATEA na LOE ye la xuba de financiación a la escuela particular concertada, que va tener un 3'1% de presupuestu cola llei nueva sigún les cuentes de SUATEA, que denuncia qu'ello ye un disviu de recursos de la pública a les empreses que remanen la particular.