Prohiben l'usu del asturianu "por el bien de los perros" y porque "estamos en España"

L'Asociación Amigos del Perro prohibe a una voluntaria que s'esprese n'asturianu nel foru de facebook de l'asociación y acaba espulsándola

Esta mañana una voluntaria de l'Asociación Amigos del Perro, vio cómo l'usu del asturianu provocaba nun primer momentu una petición d'un de los coordinadores de que dexare d'usar la llingua asturiana nes sos intervenciones porque nel foru había persones residentes n'Asturies que nun yeren asturianes y podíen, según esta persona, tener problemes de comprensión.

Al negase la voluntaria de dexar d'usar del asturianu, el coordinador alvirtió públicamente al restu de los miembros que nun diba a contesta-y a nenguna de les sos intervenciones si nun les facía en castellanu.

Énte la polémica xenerada, la voluntaria acabó siendo espulsada fulminantemente de l'asociación, acusada de falta de “responsabilidá y confidencialidá" y de "nun siguir les instrucciones".

Catálogu d'ignorancia y prexuiciu llingüísticu

Los mensaxes nel foru públicu de l'asociación foron na so mayoría d'apoyu a la espulsión y ente les argumentaciones,  produzse un auténticu ensañamientu y falta de respetu contra'l derechu de la voluntaria y contra l'usu del asturianu, calificando la llingua asturiana como útil pa "falar coles cabres", comparando la situación asturiana cola catalana, comentando cómo hai que falar castellanu "por el bien de los perros", o espresando'l disgustu que produz oyer a los turistes "hablar en sus lenguas".

En sen contrariu una de les voluntaries, inglesa pa más señes, manifestaba qu'a ella nun-y molestaba l'usu del asturianu y que nun yera nada difícil d'entender.

Estamos en España

La presidenta d'Amigos del perro atayó la polémica con un comentariu, tamién públicu, nel que dicía a los voluntarios. "Se habla español porque estamos en España. Así que, vamos a lo nuestro que son los animales".

Reaición na rede

Dende que se conoció la noticia delles cuentes de Facebook y Twitter tán difundiendo esti casu nuevu de discriminación y de falta de respetu, a la que tamién respondió Iniciativa pol Asturianu que s'ufiertó pa poner en marcha un taller de sensibilización cola diversidá llingüística dientro de la entidá y el colectivu faciendo País, venceyáu a IX..

Dempués de dir de "dialogante" per priváu, publica la foto 1, y dempués d'espulsala del grupu publiquen la 2 pic.twitter.com/RMaZIb7dqv

— Xrd (@xurde_lon) 1 de septiembre de 2016

Paeznos inalmisible que cualesquier coleutivu d'Asturies niegue a una persona'l derechu a espresase na nuestra llingua. @AmigosdelPerro

— Faciendo País (@faciendo_pais) 1 de septiembre de 2016