Proclamaes la mitá de les candidatures d'UNIDÁ a los conceyos

La mitá de les candidatures a conceyos de la coalición UNIDÁ tan aceptaes, concretamente 5 de les 10 candidatures presentaes fueron proclames ayer poles distintes Xuntes Electorales de Zona. Sigun asoleyó'l BOPA, les candidatures que s'integren na coalición de los conceyos d'Ayer, Riosa, Samartín del Rei Aurelio, Tinéu y Valdés. Estes cinco candidatures tienen la mesma denominación que les cinco non proclamaes, que son les de Xixón, Uviéu, Avilés, Castrillón y Les Regueres. Asimesmo nenguna de les candidatures a la Xunta Xeneral d'UNIDÁ ta proclamada. Per otru llau, otres cinco candidatures incluyíes nel alcuerdu municipal d'UNIDÁ, les de Mieres, Piloña, Nava, Carreño y Corvera dieron-yos el preste, anque nestos casos la denominación cola que se presentaron escluín el nome d'Andecha Astur, usando la denominación sigún los casos d'Izquierda Asturiana, Asturianistes, Andecha por Carreño o Unidá-Andecha por Corvera-Izquierda Asturiana-Los Verdes-Grupo Verde.

La disparidá de criterios de les diferentes Xuntes Electorales de zona a la hora d'aceptar la inclusión d'Andecha Astur na coalición UNIDÁ fai que solo les llistes baxo la xurisdicción de la Xunta Electoral de Zona de Xixón, Avilés y Uviéu nun seyan aceptaes. Si bien nel casu d'Avilés y Castrillón nun había duplicidá de les sigles d'Andecha Astur, lo que si ocurre nos casos d'Uviéu y Xixón y tamién nos de Riosa y Samartín del Rei Aurelio, estes dos últimes proclamaes pola Xunta Electoral. De cualesquier forma los responsables de la coalición dieron anuncia de la presentación de recursos contra la esclusión d'eses cinco candidatures a conceyos y de les llistes autonómiques. Sigun conseña la Llei Orgánica del Réxime Electoral Xeneral, a partir de la proclamación cualesquier candidatu escluyíu y los representantes de les denegaes, disponen d'un plazu de dos díes pa interponer recursu contra los alcuerdos de proclamación de les Xuntas Electorales, énte'l Xulgáu de lo contenciosu-alministrativu.
La resolución xudicial habrá dictase nos dos díes siguientes a la interposición del recursu y tendrá carácter firme y inapelable, anque ensin perxuiciu del procedimientu d'amparu énte'l Tribunal Constitucional.
Nesti casu, l'amparu deberá solicitase nel plazu de dos díes y el Tribunal Constitucional debe resolver ente los díes 4 y 10 de mayu.