Principien les dos cites cola cultura celta de Tapia y de Xixón

Los siguidores de la cultura del Arcu Atlánticu van poder disfrutar esta selmana de dos intercélticos n’Asturies. Esti martes principia en Tapia’l XV Festival Intercélticu d’Occidente, y en Xixón, el III Festival Internacional 5º 40’.
 
En Tapia, l’actividá va dar entamu a les 19 hores con un actu d’inauguración consistente nel izáu d’una ‘bandera multicultural’ nel que van tar presentes toles naciones que participen nel Intercélticu entamáu pola Banda de Gaitas Occidente. L’alcalde, Manuel Jesús González, y el direutor del certamé, Martín F. Cascudo, van intervenir nesti eventu pa depués caleyar el Mercáu Medieval instaláu nes places de la Constitución y Campogrande.
 
Darréu, van desplazase al Auditoriu municipal pa la inauguración, a partir de les 20 hores, de la tercer edición de les xornaes Culturlingua, que tienen como oxetivu difundir la cultura propia del llugar y d'Asturies y que, amás, ufre la posibilidá de mercar llibros, música y materiales en gallego-asturianu y asturianu nun stand instaláu pa la ocasión. Nesta primer xornada, van presentase los llibros ‘Memoria das maos’ y ‘Volta de paso’, pa depués dar pasu a l’actuación del grupu serbiu Kolugara. Culturlingua va allargase hasta mañana, na que ta previsto una charra-coloquiu baxo’l nome ‘A Filarmónica nel recordo', a les 20.15 hores, sobre la banda de música activa hasta finales de la década de los 40, pa pesllar depués con un conciertu del grupu Airecor (20.45 hores).
 
Pela so parte, en Xixón ta previsto pa esta primer xornada l’actuación de Teatru de Trebolén na plaza de la Casa Nava, a partir de les 19 hores, cola so obra ‘De boca a oreya’. Mentes, a les 22 hores, Héctor Braga y la so banda de folk-rock va abrir el ciclu d’actuaciones musicales na Plaza Mayor. Per delantre queden cinco díes más de folixa, cultura y tradición de raigaños celtes.