Principien en Xixón les xornaes 'Andecha’l sur' sobre la dependencia económica de la muyer

La Biblioteca Pública Xovellanos va acoyer, ente’l xueves y el sábadu, les xornaes Andecha’l sur, na que participen coleutivos feministes americanos. Nelles va reflexonase sobre la dependencia econónomica de la muyer y el desarollu.
 
El grupu de Xéneru de la Coordinadora d’ONGD del Principáu d’Asturies (CODOPA) entama estes xornaes “como espaciu nel que se dean a conocer delles reflexones y práutiques feministes alredor de los enfoques y estratexes de desarrollu, y se fortalezan alliances con organizaciones de muyeres y feministes del sur”. Asina, pa estos trés díes de charres y intercambiu d’esperiencies, los organizadores convidaron a miembros del Centro de la Mujer Peruana Flora Tristán (Perú), Calala Fondo de Mujeres (Estáu español, Nicaragua, El Salvador, Guatemala, Honduras, Belice y Costa Rica), Concertación Feminista Prudencia Ayala (El Salvador) y Movimiento de Mujeres María Elena Cuadra (Nicaragua).
 
“Nestes xoranes abórdase la cuestión de los derechos económicos de les muyeres, non sólo entendíos como la igualdá d’oportunidaes ente homes y muyeres nel accesu al mercáu llaboral y los derechos sociales que d’ello se deriven, sinón dende una perspeutiva más global y tresformadora del sistema, perspeutiva que ta nel senu de los debates feministes”, señalen dende’l CODOPA. Esta tarde, a les 18 hores, ta previsto la inauguración de 'Andecha’l sur.(in)Dependencia económica de les muyeres' cola presencia de la conseyera de Bienestar Social y Igualdá, Paloma Menéndez; l’alcadesa de Xixón, Carmen Moriyón; y la presidenta de la Coordinadora, Mercedes González, pa depués dar pasu a la primera charra, ‘La voz de las mujeres del sur: prioridad fundamental’, a cargu de Águeda Prieto, vocal de Xéneru del CODOPA. Mañana, l’actividá va principiar a les 18 hores, y el sábadu, a les 16.30 hores.