Principien en Mieres les xornaes ‘Gaiteres, Gaiteros, Gaites…’

La Casa de la Música de Mieres acueye dende esti martes, y hasta’l xueves’, les xornaes ‘Gaiteres, Gaiteros, Gaites…’. Nestes trés xornaes va haber delles actividaes y actuaciones con esti instrumentu tradicional como protagonista.

L’Aula de Música Tradicional Ca la Música, Animación Cultura Asturiana y el Conceyu de Mieres son los impulsores d’esta iniciativa dedicada a la música tradicional del país. La presentación de ‘La misa de gaita . Hibridaciones sacroasturianas’, d’Ángel Medina Álvarez, va abrir les actividaes a les 19 hores, que continuarán una hora depués cola intervención d’Eugenio Otero Vega, Fonsu Fernández García y Gausón Fernande Gutierre, que van a dar a conocer los detalles de la espublización ‘Cancioneru de la Gaita Asturiana’, un estudiu rigorosu sobre esti instrumentu fundamental na música asturiana que tien una rellevancia especial nel campu de la etnografía y el folclor del país.

El miércoles, a les 20 hores, va celebrase un conciertu del Aula de Música Tradicional Ca la Música-Escuela de Música de Mieres, pa continuar coles xornaes el xueves, a les 19 hores, cola presentación del llibru ‘Les gaites’, trabayu d’investigación de Dani García de la Cuesta sobre la historia del instrumentu. Va zarrar ‘Gaiteres, Gaiteros, Gaites…’ el musicólogu Llorián García cola conferencia ‘Gaiteres y pandereteros, xénero y tresxéneru na música tradicional asturiana’, que tien como base la so tesis doctoral. Toles actividaes son d’entrada llibre.