Principia'l Certame Estatal de Curtiometraxes Aula 18 con una gala nel teatru municipal de L'Entregu

Esti llunes, a les 19.30 hores, va principiar el Certame Estatal de Curtiometraxes Aula 18 con una gala nel teatru municipal de L'Entregu. Nesta edición participen trés cintes onde hai presencia de la llingua asturiana.

L'entamu de la gala d'inauguración del festival va tener llugar a les 19.30 hores y nella va proyeutase'l llargumetraxe 'El cuento Duna', ópera prima del direutor asturianu J. K. Álvarez. Per delantre, quedarán seis xornaes nos que los asturianos van poder ver los meyores trabayos que se tán faciendo agora nel Estáu. Nesta edición d'Aula 18 van participar 40 curtios na seición oficial y 12 na seición asturiana, que va celebrase'l llunes 17. Estes 52 cintes tuvieron que pasar un procesu de seleición duru, yá que la organización esbillólos ente los 400 presentaos a concursu.

Ente les cintes que van emitise estos díes –martes, xueves, vienres, martes 18 y miércoles 19–, a partir de les 19.30 hores, nel teatru municipal de L'Entregu; na Casa de la Mocedá de Sotrondio; nel Café La Yenda y el chigre Ochobre –nestos establecimientos l'horariu se retrasa con respeuto al oficial en toles xornaes del certame–, tamién en L'Entregu; y nos centros culturales de Caxastur en Xixón y Uviéu, hai trés nos qu'hai presencia de la llingua asturiana, según confirma la organización: 'Cavite', 'Pan d'escanda' y 'Viejos perdedores'. Estos curtios van poder vese'l llunes 17 a les 19 hores nestos llugares y a les 11 hores nel teatru nuna sesión especial pa los escolinos y escolines de Samartín del Rei Aurelio. 'Viejos perdedores' tamién va proyeutase'l vienres dientro de la seición oficial, yá que ye una de les dos cintes asturianes escoyíes pa optar al primer premiu del concursu, que va dase a conocer el 5 de payares nuna gala nel teatru municipal de L'Entregu. L'otru trabayu asturianu a concursu ye 'Anorexia'.

 "Tamos mui contentos pola calidá de les cintes asturianes que participen esti añu nel Aula 18 depués d'un añu floxu", destaca Manuel Suárez, presidente d'un certame yá consolidáu tres catorce ediciones nel que tamién hai sitiu n'asturianu, como amuesa qu'un de los premios del festival sía'l del meyor curtiu en llingua asturiana. "Ye un retu y una proeza facer dalgo n'asturianu", eloxa Suárez, que tamién resalta'l bon nivel de cintes que se tán rodando na llingua del país y l'esitu que tán teniendo fora de les nueses llendes, como 'Nun val la pena conquista la tierra' o '7337'.