Principia n’Uviéu la Xunta d’Escritores Asturianos 2012

Esti xueves, a les 16 hores, va principiar n’Uviéu la Xunta d’Escritores Asturianos 2012, que va continuar el vienres y el llunes. Nesta ocasión, l’alcuentru cultural biañal tien pol lema ‘Lliteratura asturiana y oficialidá’.
 
La Biblioteca del Campu San Francisco d’Uviéu va ser sede estos trés díes de presentaciones, ponencies y alderiques que van axuntar a un bon númberu d’escritores en llingua asturiana y de persones interesaes na nuesa cultura, yá que la entrada pa tolos actos de l’alcuentru ye llibre. Les actividaes van entamar cola presentación de les actes de la Xunta d’Escritores Asturianos 2010, que lleven el títulu de ‘Lliteratura asturiana, identidá y nación’, pa depués dar pasu, a les 16.30 hores, a l’ayerán Ánxel Álvarez Llano, encargáu d’abrir les actividaes d’esta edición cola ponencia ‘A la solombra del Surdimientu’.
 
Darréu, a les 17.30 hores, el turnu ye pa Carlos X. Blanco Martín, que va falar de ‘Barruntos y condiciones pal xorrecer d’un ensayu en clave nacional’, y, a les 18 hores, pal responsable de la Secretaría de Llingua Asturiana del sindicatu SUATEA, Xosé Lluis Colondrón, que va esponer a los presentes el ‘Presente y futuru de la enseñanza del asturianu’. Pa zarrar esta primer xornada, ta prevista la presentación del llibru ‘Les Asturies y el nacionalismu bascu’ (19 hores), de Xaviel Vilareyo, escritor que, a continuación, va falar sobre ‘El modelu llingüísticu n’asturianu’.
 
Les actividaes van continuar mañana, tamién a les 16 hores, cola presencia de Xuan Carlos Crespos Lanchas, que va presentar nun primer momentu la so obra narrativa, pa después esponer el so métodu creativu a los presentes. L’historiador Evaristo C. Martínez-Radío va ser el siguiente en participar, a les 16.30 hores, con una ponencia perinteresante que lleva’l títulu de ‘Ciudadanos asturianos escontra Napoleón’. El restu d’actividaes del día van centrase na situación del nuesu idioma nel esterior. Asina, a les 17.30 hores, va presentase’l llibru ‘El patrimonio lingüístico cántabro’ editáu pol Gobiernu de Cantabria y l’Asociación para la Defensa de los Intereses de Cantabria (ADIC), pa de siguío averar a los presentes a ‘L’estremeñu y la su literatura’ (18 hores) con una conferencia a cargu de Ismael García Carmona. Pa finar, a les 19 hores, va entamase un alderique sobre la situación del asturianu fuera de les nueses llendes.
 
La xornada cabera de la Xunta d’Escritores Asturianos va ser el llunes, tres un parón pela fin de selmana. Beatriz Rato Rionda va abrir l’actividá a les 17 hores con una charra sobre ‘El cultivu del maíz nel Conceyu de Xixón’, a la que va siguir media hora más tarde C. J. de la Sala González cola ponencia ‘Política y arqueología: Roma, godos y Reyes Católicos. La santísima trinidad de la historiografía centralista’. Mentes, a les 18.30 hores, el direutor de la seición de Cine del Ateneo Obrero de Madrid, Miguel Losada, va falar sobre ‘Cine y literatura, la traición necesaria’, a la que va siguir un alderique sobre la situación del cine n’Asturies nel que van participar Alfonso S. Suárez, Sofía Menéndez, Geno Cuesta, Juan Gona y el propiu Losada. Pa les 20 hores ta previsto’l zarru d’esta edición d’esti alcuentru cultural.