Principia la puesta de la segunda dosis a los 45.414 vacunaos col preparáu de Janssen

Tornen a aumentar los contaxos, anque baxen les hospitalizaciones. Trés persones finaron la selmana pasada con COVID-19.

La decisión tomada por consensu a nivel estatal de poner una dosis de refuerzu con Pfizer/BioNTech o Moderna a les persones vacunaes con Janssen llévase a la práutica dende güei nel país. Un total de 45.414 asturianos recibieron el preparáu, únicu monodosis, esti añu.

Mentes, sigue la puesta de la tercera a les persones mayores de 70 años xunto cola del gripe. Hasta'l momentu más de 87.400 ciudadanos yá cuenten con dambes.

De 29 a 39

Llueu d'un pequeñu descensu en contaxos, tornen a xubir los positivos n'Asturies. Na selmana pasada rexistráronse 270 polos 200 de l'anterior, lo que significa 39 casos diarios de media estos díes.

La evolución selmanal d'esti datu dende qu'entamaron a medrar la tresmisión del coronavirus SARS-CoV-2 ye la siguiente: 11, 13, 17, 22, 32 y 29, hasta los 39 actuales. El total de positivos no que va d'andanciu queda en 41.692.

Magar esti empeoramientu de les cifres, la presión hospitalaria desciende. Baxen de 34 a 27 los ingresaos, de los que 19 tán en planta, 7 menos, calteníendose 8 persones na UCI.

Por últimu, hai que llamentar la muerte de trés persones estos siete díes últimos, que fai aumentar la cifra de finaos cola enfermedá causada por esti coronavirus hasta la cantidá de 2.084.

Na semeya, una persona recibe la vacuna de Janssen n'abril.