Principia’l XV Festival Intercélticu d’Avilés y Comarca, dedicáu a Éire

Les actuaciones de Sophie & Fiachra (Canadá/Éire) y Velha Gaiteira (Trás-os-Montes) van protagonizar la primer nueche celta del XV Festival Intercélticu d’Avilés y Comarca (FIAyC) . Esta edición, que va allargase hasta’l día 31, ta dedicada a Éire.
 
D’esta forma, Avilés va completar un mes de claro sabor célticu. El FIAyC, certame entamáu pola Asociación Cultural Esbardu, ye’l más veteranu de la ciudá y, al igual que’l Beltaine, va trayer artistes de primer nivel a la villa. Pa principiar, esta nueche van xubise al escenariu de la plaza’l Carbayéu, a partir de les 23.15 hores, Sophie & Fiachra y Velha Gaiteira na nomada Nueche Pésica. A ellos van xuntase, nes xornaes próximes, nomes como Pandereteiras Da Estrada y Tequexetéldere (Galicia), Dunoon Argyll Pipe Band (Alba), el grupu de baille Scoil Rince Cualann (Eire), Fernando Mosquera (Castilla) o los llocales Esbardu, ente otres munches bandes y agrupaciones.
 
Amás de música, na villa tamién va haber sitiu nestos diez díes pa delles conferencies, ente les que destaca la del premiu nobel Seamus Heaney el domingu, a les 19 hores nel Niemeyer; un mercáu celta na plaza’l Carbayéu: o actividaes pa neños y neñes, ente otres munches alternatives.