Presentóse oficialmente la coalición Izquierda Xunida - Bloque por Asturies - Los Verdes

La coalición Izquierda Xunida - Bloque por Asturies - Los Verdes fizo esti sábadu 24 la so presentación oficial con vistes a les elecciones asturianes del próximu 27 de mayu nun actu que se celebró n'Uviéu y al qu'asistió'l Coordinador Xeneral d'Izquierda Xunida Gaspar Llamazares.

El coordinador xeneral d'Izquierda Xunida d'Asturies y candidatu a la presidencia Jesús Iglesias centró la so intervención na reivindicación "urxente" d'un estatutu d'autonomía nuevu qu'apurra les "máximes posibilidaes d'autogobiernu" y sorrayó la idea de que la so formación nun va aprobar un estatutu que nun incluya la oficialidá de la Llingua". Iglesias criticó al PP por ser el "responsable principal" de que nun haya un estatutu d'autonomía nuevu p'Asturies y acusó tamién al PSOE de "nun facer tolos esfuerzos" pa ello porque s'afaya na situación actual.

Pela so parte, el secretariu xeneral del Bloque por Asturies, Rafael Palacios, pidió que la izquierda s'axuntare "pa que nunca gobierne la derecha" y enfotóse nel bon momentu actual qu'albidra pa una candidatura d'izquierdes énte l'agotamientu de les polítiques del PPy el PSOE, partíos a los qu'acusó de tener "candidatos eternos que nun aporten nada".

Pela parte de Los Verdes, faló'l so representante Juan Ignacio González, que fizo un llamáu a la defensa de los derechos civiles de la sociedá asturiana y que pidió una vertebración del territoriu qu'ayude a recuperar l'oriente y occidente asturianos, afitándose tamién na reivindicación d'un estatutu de máximos y el reconocimientu de la oficialidá.

El turnu d'intervenciones pesllolu'l Coordinador Xeneral d'Izquierda Xunida Gaspar Llamazares, que defendió les posibilidaes electorales de la coalición por tener nel so estiyu "una esperiencia positiva de gobiernu n'Asturies" y que criticó PP y PSOE por dá-yos a les elecciones a conceyos y autonómiques de mayu "una clave de primaries" y de "examen pal gobiernu central" un enfoque col que Llamazares aseguró que se pretende "tapecer l'oscurantismu, la corrupción urbanística y la privatización de los servicios públicos en conceyos y autonomíes".