Presentóse l'Anuariu de la Música asturiana

Esti vienres pela mañana L'Aguañaz presentó nos
locales dela SGAE d'Uviéu l'Anuariu de la Música Asturiana 2002.




Ye'l tercer añu que sal a la cai esti anuariu, que quier ser un
resumen del añu musical n'Asturies, amás d'un espaciu
p'artículos que tienen a la música asturiana como exe central.
L'Aguañaz quier crear otru mediu pa espardir lo que ta faciéndose
anguaño na escena musical asturiana.



L'Anuariu entama con un artículu de Xosé Ambás,
gaiteru y cantante de "N'Arba", amás de miembru del grupu
"Andecha
folclor d'Uviéu". Nel artículu fala del procesu de
recoyía de material etnográficu, cuála ye la
situación de los archivos, historia del trabayu etnográficu
n'Asturies,...etc. Depués podemos lleer un artículu d'Alberto
Álvarez Peña sobre "Lleendes sobre cuernes y turulles";
más p'alantre, Daniel García de la Cuesta escribe al rodiu de la
bandurria, instrumentu casi abandonáu, qu'anguaño quier salir del
escaezu.



Florentina Cuadriello, Tina, trata'l tema de "La muyer na
iconografía musical asturiana", tema qu'ella trató nel so
últimu llibru "Representación d'instrumentos musicales nel
arte asturianu.". Fernando Ornosa fai una pequeña referencia a una
iniciativa perimportante pa la música tradicional, la creación
del "Archivu de la música tradicional" nel
Muséu del
Pueblu d'Asturies.



L'Anuariu tamién echa tamién una güeyada al panorama
d'aguaño, una revisión a la historia de "Dixebra", una
entrevista a "Corquiéu", un reportaxe sobre
"Fardaxu"y un repás a les novedaes discográfiques y a
los conciertos del añu n'Asturies son el tueru d'esta parte del
Anuariu.



Como l'añu pasáu, l'Anuariu tamién tien sitiu pal
humor. Esta vegada ye un comic que trata la historia del folk con una
visión acida y cómica. D'equí a poco podréis ver
esi mesmu comic nesta sección. P'aquellos quen nun vieron el comic del
añu pasáu, equi
tenéis l'enllaz al mesmu.