Presentóse la sidra con denominación d'orixe

Un añu depués de la so constitución llegal, el Conseyu Regulador de la Sidra Asturiana con
Denominación d'Orixe presentóse ayeri nun actu públicu nel
Muséu del Ferrocarril d'Asturies al qu'asistieron los alcaldes de los conceyos sidreros y la Conseyera d'Agricultura y Pesca Servanda García, amás de representantes de la industria de la sidra y productores de mazana. Nel actu diose a conocer la imaxe de marca de la primer sidra que nel 2.004 va salir al mercáu acoyío a denominación, y diéronse tamién datos sobre la collecha de mazana d'esti añu, que vieno marcáu poles altes temperatures qu'adelantaron el tiempu de pañar la mazana.

Con seca y too, los 39 llagareros que l'añu qu'entra van vender sidra con denominación d'orixe cuenten con tirar una producción mayor que la que se contaba, que yera d'un millon de llitros. Sicasí, la sidra de denominación nun va representar una producción masivo, y ye que si los llagares asturianos embotellen al añu sobre 20 millones de llitros de sidra, la de denominación nun va representar más del 5% de la producción total nel meyor de los casos.

Mientres que la sidra normal faise con mazana de procedencies estremaes, lo de denominación tien de ser, a la fuerza, de mazana asturiano dafechu, colo que la producción pue cambiar muncho d'un añu pa otru, y tamién el preciu. Amás, tampoco nun val tola mazana, namás les 22 clases almitíes na denominación y que salgan de pomaraes rexistraes en Conseyu. el consumidor va conocer que la sidra ye de denominación por una etiqueta marcada pol Conseyu Regulador, una entidá que va financiase con una tasa del 2% del preciu de cada botella y del 2% tamién de cada kilu de mazana que los productores vendan al llagar.

La sidra de denominación, arriendes de minoritario, tamién va ser caro, anque los representates de los llagareros falaben ayeri de que'l preciu tendría de ser "competitivu" entendío esto en términos de nun estremase muncho del preciu de la sidra normal. Anque nun quixeron dar númberos de cuanto va valer la botella, pa facese una idega val dicir que la sidra de mazana escoyío qu'esti añu presentaron dellos llagares como esperimentu previu a la comercialización de sidra de denominación cobrábase a 2,5 euros, contra los 2 de la botella normal.

La presentación valió tamién pa conocer otros datos d'actualidá sobre'l sector sidreru y de la mazana. El representante de Sidra Cortina espresó la preocupación de los llagareros sobre les pomaraes que se plantaron nueves estos años, que cada vegada presenten una proporción mayor de variedaes de mazana dulce, mientres que les variedaes de mazana amargo parez que tan reculando. En cuantes a los datos totales de la collecha, la seca d'esti añu dañó un terciu de la collecha, que suel andar ente los 45 y 60 millones de kilos. D'esti total, cerca de 3 millones de kilos van ser los que s'empleguen pa la sidra de denominación.

Pa conocer toles actividaes del Conseyu yá ta funcionando una completa páxina web. Llama l'atención que pa un productu tan identificativu y tan identitariu de la personalidá d'Asturies tola imaxe corporativo del conseyu y el mesmu nome del productu a promocionar empleguen esclusivamente la llingua castellana pa dase a conocer y que'l "leit motiv" de la campaña publicitaria seya "Sigue nuestro consejo, llámala por su nombre"