Presenten 46 candidatures a los Premios Timón

El sábadu finó’l plazu pa la presentación de candidatures a los diferentes Premios Timón qu’entrega l’Asociación Cultural L’Arribada mientres la Vagamar. No que correspuende a los gallardones lliterarios, nesta edición aspiren los escritores nacíos nel añu 1965 o enantes.

Pal IX Premiu Timón p’autores en llingua asturiana y eonaviego hai un total de 19 candidatos: Lurdes Álvarez, Cristina Muñiz Martín, Esther Prieto, Xosé Miguel Suárez, Esther García López, Belén Rico, Adolfo Camilo Díaz, Taresa Lorences, Xavier Frías Conde, Ignaciu Llope, Xosé Lluís Campal, Xulio Berros, Xulio Arbesú, Alberto Cobreros Gil, Consuelo Vega, Milio’l del Nido, Carme Martínez Pérez, Xilberto Llano y Ánxel Álvarez Llano. N’ediciones anteriores reconocióse la trayeutoria de Nené Losada Rico (2007),  Xuan Xosé Sánchez Vicente (2008),  Manuel García ‘El Galano’ (2009), Roberto González-Quevedo (2010), Vicente García Oliva (2011),  Antón García (2012), Miguel Rojo (2013) y Xosé Bolado (2014).

Dos aspirantes más hai pa llevar el VI Premiu Timón p’autores asturianos en castellanu, tando la llista conformada por Fulgencio Argüelles, Pilar Sánchez Vicente, Francisco Álvarez Velasco, Pepe Monteserín, José María Ruilópez, Carmen Gómez Ojea, Herme G. Donis, Tino Pertierra, Aurelio González Ovies, Francisco García Pérez, José Luis Campal, Paco Abril, Luis Arias Argüelles-Meres, Fernando Fonseca, Ricardo Labra, Javier Lasheras, Pedro de Silva, José Luis Argüelles, Juan Cueto, Olvido García Valdés y Ángel García Prieto. Nesta estaya, el palmarés inclúi los nomes de Luis Fernández Roces (2010),  Juan Méjica (2011),  Fernando Menéndez (2012), Gonzalo Suárez (2013) y Carmen Ruiz-Tilve (2014).

Una figura de Jesús Castañón como recompensa

No que respeuta al gallardón más mozu, el III Premiu Timón de Cultura Asturiana, que valora a aquelles asociaciones, sociedaes y fundaciones con sede n’Asturies que tengan por fin la conservación y promoción de la identidá cultural de nueso, el númberu de candidatures ye de seis: Fundación Belenos, Asociación Cultural San Tirso del Eo, Fundación Nueva Asturies, Fundación Caveda y Nava, Iniciativa pol Asturianu y Asociación pola Recuperación de los Sidros y les Comedies ‘El Cencerru’ de Valdesoto. Nes dos ediciones anteriores resultaron ganadores l’Asociación Cultural Ensame Sidreru (2013) y la Xunta pola Defensa de la Llingua Asturiana (2014).

Tres conocese tolos candidatos, va procedese a la convocatoria de los trés xuraos que decidirán quiénes merecen llevar los Premios Timón d’esti añu. Como ye vezu, la recompensa va ser un figura del ceramista xixonés Jesús Castañón, que s’entregará mientres la Vagamar, actividá setembrina de L’Arribada que cumple diez ediciones.