Presentáu el Día d'Asturies en Casu

Destaquen los conciertos d'Anabel Santiago, Rodrigo Cuevas, Petit Pop, la Muestra de Folclore, el teatru na cai y los talleres de llabores tradicionales.

La cultura popular y el deporte tradicional van ser un añu más los grandes protagonistes del Día d'Asturies qu'organiza'l Gobiernu del Principáu d'Asturies, qu'esta fin de selmana va tener a Casu como llugar de celebración. El viceconseyeru de Cultura y Deporte, Vicente Domínguez, y l'alcalde del conceyu, Miguel Ángel Fernández detallaron güei'l programa.

Como vien siendo habitual nos últimos años, la fin de selmana festiva va abrise'l vienres con un conciertu de relevancia. Nesta edición, Anabel Santiago va ser la encargada d'aniciar la fiesta na Plaza del Conceyu. Rodrigo Cuevas el sábadu, y Petit Pop el domingu completen les actuaciones más populares del Día d'Asturies.

El Coru Mineru de Turón, Luis Núñez y los Folganzanes y los conciertos de tonada de l'Asociación d'Intérpretes de Canción Asturianu (AICA) y l'Asociación del Canción  y el Folcklore Valle del Nalón, completen la ufierta musical del programa. L'amuesa de folclore va cuntar cola actuación del Grupu Folclóricu Blimea y la Banda de Gaites Garulla, qu'amás van animar Casu con pasucáis mientres los dos díes.

El sábadu va haber teatru de cai itinerante col montaxe de Carlos Alba Cellero, Llázaro de Tormes, premiu Nel Amaro 2018, y cine nel Centru d'Interpretación del Parque Natural de Redes, cola programación de Cien díes de soledá. Va tar presente'l so director, José Díaz.

El Mercáu tradicional y la Feria de productos asturianos van tar allugaos na Plaza del Conceyu y na Plaza del Mercáu. El sábadu programóse una masterclass d'escanciáu de sidra y una amusesa de campeones. Na Pumarada de la Torre va tar asitiada la Muestra y talleres de llabores tradicionales.

Deporte y museos

Los deportes tradicionales parten les sos convocatories ente la Plaza del Conceyu y la Pumarada de la Torre. Los eventos van tar protagonizaos pol Club Deporte Rural Quimarán, Forno Monte Areo, y el Grupu de Deporte Rural 6 conceyos.

Casu va abrir al públicu mientres los dos díes, gratuitamente y con visites empuestes con places llindaes, la Ilesia de Tañes, el Muséu de l'Apicultura (Tañes), el Muséu de la Madera (Veneros) y el Centru d'Interpretación del Parque Natural de Redes (El Campu).

Semeya: Vicente Domínguez (viceconseyeru de Cultura y Deporte)  y Miguel Ángel Fernández (alcalde del conceyu de Casu)