Preséntase'l númberu 19 de la revista 'Cultures' en Villaviciosa

Va ser esti xueves a les 20 hores.

L'Academia de la Llingua Asturiana (ALLA) va presentar el númberu 19 de 'Cultures. Revista Asturiana de Cultura', correspondiente al añu 2015, nun actu entamáu pol Serviciu de Normalización Llingüística de la 'Comarca de la Sidra' na Casa los Hevia. Nél van intervenir l'alcalde Alejandro Vega y Roberto González-Quevedo, direutor de la espublización, amás de Xuan Pedrayes Obaya y Carme Pedrayes Toyos, que participen na revista.

Nesti exemplar de 'Cultures' los llectores van atopar dellos artículos d’estremáu calter, como los de González-Quevedo 'Paisax y cultura n’Asturies (II). Los oratorios como oxetivación d’idees y valores' y 'Categorización de cultura ya naturaleza nos cuentos populares d’animales'; ''Las ermitas de ánimas' de la comarca de los ríos Andarax y Nacimiento (Almería)', de Manuel Francisco Matarín Guil; 'Catálogu de los oratorios en Conceyu Villaviciosa', de Pedrayes Obaya; 'Aguilandeiros de San Xuan en Villapañada (Grau)', de Ramsés Ilesies y Xosé Antón Fernández 'Ambás'; y 'Vezos y creyencies en conceyu Villaviciosa', de Pedrayes Toyos.

La revista, que tien un preciu de 10 euros, sigue cola 'Faza d’histories de vida' colos trabayos de Milio’l del Nido ('Mio tíu Milio') y Pepe Monteserín ('Pa vaques, el mio hermanu' y 'L’octavu pasaxeru'), y fina cola estaya 'Reseñes', de Juan Alfonso Fernández García, con 'En 'Ca’l Gaiteiru' o l’entamu de la reconstrucción historicista de la gaita n’Asturies'.