Preséntase'l cartel del Crossroads 2004

El festival internacional de música Crossroads 2004 va traer a Xixón a delles de les formaciones más representatives del panorama internacional del blues y del rock&roll. Tres delésitu de la primer edición nel añu 2.003, la segunda convocatoria del Crossroads, que tien puestes feches pal 23 y 24 de xunetu va contar cola presencia especial de los Stray Cats como yá adelantáremos n'Asturies.com. El grupu de Brian Setzer, que vuelve a xuntase dempués de 12 años, namás va dar dos conciertos nel estáu, el de Xixón y otru en Barcelona.

Con ser los Stray Cats el mayor ganchu del cartel, otra presencia importante va ser la de Buddy Guy, un bluesman de Chicago que ye influyencia reconocida por xente como Jeff Beck, Jimi Hendrix o Eric Clapton. El repartu de participantes sigue col grupu de rock d'Atlanta Kings of Leon y cola curiosa presencia de los Hayseed Dixie, que faen versiones bluegrass y country de grupos hevy como Metálica. Pela so parte, el swing va ponelu la banda del saxofonista Ray Gelato. El tríu de rockabilly The Dempseys, el rock bostonianu de los 70 de Nervous Eaters, el rock and roll pasáu de vueltes de los Hi-Risers y la mecigaya de Motown y surf de The Come Ons completen el cartel de grupos estranxeros xunta otra de les propuestes más particulares del festival, casu de los finlandesos Laika and the Cosmonauts, qu'amiesten surf, garage y punk. El grupu español de punk-pop de The Meows y los mierenses Trash-tornados rematen la llista de grupos presentes nesti festival pal que van ponese a la venta les entraes d'equí a poco.