Preséntase n’A Veiga’l séptimu númberu de la revista Trabatel

|
Trabatel 7

La publicación nació como un escaparate pa la creación lliteraria actual en gallego-asturianu.

Trabatel,  la revista eonaviega de lliteratura presenta’l so séptimu númberu esti vienres 3 de febreru, a les siete de la tarde, na sala d’esposiciones Luis Fega de la Casa de Cultura d’A Veiga.

Esta publicación anual, de calter non venal, ta editada pola Conseyería d’Educación y Cultura. Nació nel 2008 cola finalidá d’ufiertar un espaciu pa dar a conocer la creación lliteraria en gallego-asturianu. Esta entrega nueva ufierta collaboraciones lliteraries inédites de José Manuel Martínez Castro, María José Fraga Suárez, Miguel Rodríguez Monteavaro, Emma Méndez, Ricardo Saavedra Fernández-Combarro y Iván de Cazarón. Incluye amás una traducción al gallego-asturianu d’un cuentu de James Thurber y reseñes de llibros publicaos nesta llingua. Ye vezu que la revista tea ilustrada por fotógrafos de la zona occidental: nesti casu trátase del profesional tapiegu Juan Manuel Fernández García, Juanma.

Como complementu a la presentación, va haber depués un coloquiu sobre la situación de la lliteratura en gallego-asturianu que va cuntar cola presencia de los escritores Belén Rico Prieto, Fredo de Carbexe y Iván de Cazarón. El públicu asistente va recibir como regalu un exemplar de la revista, que tamién va unviase a los centros educativos y biblioteques de la zona occidental.

Contador Estadistiques