Preséntase l'inventariu de patrimoniu industrial de Llangréu

A les ocho d'esta tarde, na casa de Cultura de La Felguera, va presentase l'inventariu de patrimoniu industrial del Conceyu de Llangréu, un catálogu que facía bien de falta nun conceyu que ye de los más importantes en materia de patrimoniu industrial. La xeógrafa Ana Pardo ye la responsable d'esti trabayu de catalogación que vien a descubrir los elementos patrimoniales que desapaecieron dende va quince años p'acá y tamién incluyir otros que d'aquella nun se tuvieron en cuenta. Ello ye qu'esti catálogu nuevu vien a remocicar, no que se refier a Llangréu, al catálogu oficial que ficiere en 1.986 la Conseyería de Cultura abarcando tol país y que ye'l que sigue valiendo pa los más de los conceyos d'Asturies. Con más de 358 elementos, el catálogu del conceyu complementa tamién al que se-y encargó a la Universidá d'Uviéu pal Muséu de la Siderurxa, llamando más l'atención nelli los elementos que desapaecieron que les nueves incorporaciones. Ente les ausencies rescamplen les cases del arquitectu Fernando Bustelo en Barriu d'El Pilar pa la eléctrica Fenosa o el segundu castillete del Pozu Fondón, onde ta l'archivu d'Hunosa. La piqueta tamién llevó estaciones de tren como la de la Renfe en La Felguera y elementos preindustriales como la Tahona de Granda, conxuntu de servicios asociáu a l'antigua fábrica de Duro Felguera.