Preséntase la Ponencia Abierta de la Xunta

La Xunta pola Defensa de la Llingua Asturiana va a presentar esti xueves 28 de payares el documentu final de la Ponencia Abierta con toles firmes que lu sofiten. La Xunta diz que'l documentu ye'l resultáu d'un diagnósticu fríu, realista y radicalmente comprometíu de la situación na que sobrevive la llingua asturiana nun momentu como’l presente, nel qu’aguanten con una intensidá desconocida dende hai años los ataques en contra de los pocos avances sociales qu’algamó la nuestra llingua.

La Ponencia Abierta ye frutu del consensu y del apoyu d'estremaos axentes sociales, dende organizaciones sindicales como SUATEA, CSI o Comisiones Obreres a partíos políticos como URAS, Izquierda Xunida, Andecha Astur o Izquierda Asturiana, pasando por toa triba d'asociaciones culturales, ecoloxistes, vecinales o de mocedá que faen que'l númberu de firmantes llegue pel momentu a 80, una cantidá que va aumentar hasta'l día de la presentación yá que, hasta entós, ye posible xuntase a esti manifiestu.
Ye por ello que la Xunta pola Defensa de la Llingua Asturiana convoca a toles organizaciones firmantes al actu de presentación de la Ponencia Abierta que va tener llugar nel Auditoriu Príncipe Felipe d'Uviéu a les 19 hores del xueves 28. La XDLA diz que quier aprovechar esti actu tamién p'aconceyar coles organizaciones col envís de plantegar iniciatives futures.