Presencia asturiana na manifestación en respuesta a les sentencies contra la normalización del eusquera

Miembros de la XDLA y Iniciativa pol Asturianu, que sofitaron un manifiestu conxuntu entituláu 'Oldarraldiaren aurrean', tuvieron presentes en Bilbao na multitudinaria marcha del sábadu.

"El derechu a vivir na llingua propia ye un derechu humano que se-y niega, nel Estáu español, a millones de ciudadanos y ciudadanes con torgues de tou tipu pa vivir y usala nos servicios de tou tipu: salú, comerciales, alministrativos o trámites xudiciales", entama'l testu promovíu pola convocante Euskalgintzaren Kontseilua, que se torna al asturianu como 'Frente a la ofensiva'. "Asistimos a otra ofensiva encabezada pol poder xudicial, soberbiu na so incapacidá pa conocer y usar les nueses llingües, y que s'atribúi la capacidá esclusiva de decidir ónde, cómo, cuándo y pa qué deben esistir, recortando conquistes democrátices pa la igualdá algamaes con gran apoyu y demanda social", espresa'l mesmu.

"Frente a esta ofensiva sólo tenemos la voluntá democrática y coleutiva que caltién vivos los nuesos idiomes. Nun podemos permitir que ganen nos tribunales lo que nun son quien a ganar nos nuesos pueblos. Necesitamos avanzar más, con pasos políticos firmes y decidíos pa eliminar toles discriminaciones, toles llendes, coacciones y inxerencies y asegurar la vida con llibertá, igualdá y xusticia nes nueses llingües", fina'l manifestu robláu pola Xunta pola Defensa de la Llingua Asturiana (XDLA) y Iniciativa pol Asturianu, A Mesa pola Normalización Lingüística (Galicia); Òmnium Cultural (Catalunya); Acció Cultural del País Valencià y Escola Valenciana; y Obra Cultural Balear.

Toos ellos tuvieron representaos el vienres nuna rueda de prensa pa dar conocencia del so sofitu a la reivincidación d'Euskalgintzaren Kontseilua y de les agresiones y obstáculos que vienen sufriendo les sos llingües nel so procesu de normalización. Natalia Suárez Ríos, por XDLA, y Iván Llera, por Iniciativa pol Asturianu, participaron na mesma, anque la delegación asturiana en Bilbao pa participar na manifestación, a la que tamién acudieron los coleutivos Plataforma per la Llengua (Catalunya) y Nogará-Religada (Aragón), foi más amplia.

N'Euskadi y Navarra

La marcha, baxo'l lema 'Euskararekin bat, euskaraz bat', tuvo llugar la tarde del sábadu cola participación de "decenes de miles de persones", apuntó la organización. Ésta tuvo'l sofitu de les formaciones polítiques EAJ-PNV, EH Bildu, Geroa Bai, EH Bai y Sumar y los sindicatos ELA, LAB, ESK, STEILAS, CGT, CNT, HIRU y EHNE.

El motivu de la convocatoria, la "ofensiva última contra l'eusquera" n'Euskadi y Navarra. "Tamos viendo cómo los xueces tán invalidando midíes, normes y llleis que tienen como oxetivu la normalización del eusquera, una tres otra, na llarga cuerda de sentencies. Vemos cómo tán desmontando los instrumentos de les polítiques públiques pal fomentu del eusquera. Tamos viendo cómo, percima d'amplios consensos sociales y políticos, ta interviniendo'l poder xudicial y determinando la política llingüística. Caúna d'estes sentencias nos espertónos preocupación y angustia", espresó Euskalgintzaren Kontseilua nel discursu lleíu na manifestación, nel que demanda un "alcuerdu sociopolíticu nuevu" a favor del idioma.

Na imaxe superior, un momentu de la rueda de prensa del vienres, con Llera y Suárez Ríos a la izquierda. Semeyes d'Euskalgintzaren Kontseilua.