Preséntase un esbozu del diccionariu de Pin de Pría

Va tener llugar en Xixón esti martes cola presencia de la bisnieta del escritor.

Beatriz Hernán-Gómez, profesora de la Università degli Studi de Milano, recueye la trescripción anotada d’un volume del diccionariu de Ramón A. de Rato (1891) con notes de José García Peláez 'Pepín de Pría' (1864-1928), como parte del trabayu preparatoriu pal so diccionariu. Ésti taba yá iguáu nun manuscritu del 1925, pero desconozse'l so paraderu.

Esta edición de 'Esbozo del Diccionario de bable del centro y oriente de Asturias de José García Peláez 'Pepín de Pría'', asoleyáu pola Academia de la Llingua Asturiana (ALLA) cola collaboración de la Conceyalía d'Eduación y Cultura de Xixón, inclúi tamién cartes ente Pin de Pría y el padre Galo 'Fernán Coronas' del 1926 sobre dellos aspeutos referíos a los sos respeutivos diccionarios.

L'actu de presentación va celebrase esta tarde, a les 19 hores, na sala de conferencies del Centru de Cultura Antiguu Institutu, cola presencia d'Ana María Cano, presidenta de l'ALLA; Fernando Padilla, direutor xeneral de Planificación Llingüística y Normalización; Ana Montserrat López Moro, conceyala d'Educación y Cultura; y la propia Hernán-Gómez.