Preséntase nel Centru Social La Semiente la revista La Madeja

Esti xueves va presentase en L'Entregu, nel Centru Social La Semiente, la revista La Madeja. Esta espublización ye creación del grupu feminista que ta dientro del coleutivu social Cambalache y busca dar espaciu a persepectives invisibilizaes nos medios.
 
“Fai casi un añu, nel grupu de feminismu de Cambalache, surde la idea de publicar una revista. Pensamos que yera un espaciu aparente pa dialogar, disentir, aprender, criticar, visibilizar, socializar conocencies, asitianos, faer(nos) entrugues... Y non yá cola resultancia final, sinón tamién nel mesmu procesu d'ellaboración”, apunten los responsables d’esta revista, que conviden a más persones a sumase al proyeutu “hasta formar “un grupu heteroxéneu y múltiple nel que, dende una mirada feminista, entemecer diverses voces”.
 
“Creemos que tener una mirada feminista significa reconocer qu’un mesmu fechu nun incide por igual nes persones distintes que conformamos esta sociedá de resultes de cómo se nos identifica dientro d’ella. Dende esti puntu de vista, amás de querer dar espaciu na revista a perspeutives tradicionalmente invisibilizaes nos medios de comunicación –biografíes, ciños, vida cotidiana, masculinidaes nueves, los ciños y relaciones, etc.–, queremos ser crítiques col patriarcáu y el capitalismu, asumiendo que trabayar por un mundu más xustu pa les muyeres implica trabayar tamién por tolos otros que s’atopen nos marxes”, continúen nun comunicáu. La Madeja, que va presentase esta tarde a partir de les 20 hores nesti centru social de L’Entregu, forma parte de les publicaciones de la editorial de l'asociación Cambalache y, como toles demás, ye un proyeutu autoxestionáu que se sostien al traviés de la so venta.