Preséntase n’Uviéu la revista de creación y investigación artística ‘Plastic Crowds’

Esti martes va presentase en Lola Orato Espacio de Arte la revista ‘Plastic Crowds’ de creación y investigación artística. Creada por vigueses espardíos pel mundu, nella participa Ánxel Nava con un artículu en llingua asturiana.

'Plastic Crowds' naz cola intención de tener calter internacional, polo qu'esta espublización del coleutivu gallegu de mesmu nome coordináu pol historiador del arte Manuel Martínez Torres asoléyase en dos versiones billingüés, gallegu-francés y castellanu-inglés. De carauter cuatrimestral, la revista entiéndese como una esposición que xenera un discursu plural por entemedies de les visiones de los sos miembros, de nacionalidaes y disciplines artístiques diverses, y destaca pola so alta calidá y diseñu. “El cálter tresversal ye la sencia de ‘Plastic Crowds’. El nuesu enfotu ye facer propuestes en collaboración nes que tolos miembros interaicionen. Lo que se precura ye complementar les visiones que tenemos pola nuesa formación y apurrir dixebraos puntos de vista”, espliquen dende esti coleutivu que nagua por “investigar, crear conteníos artísticos de manera horizontal, collaborar ensin qu’importe cosa la nuesa disciplina d’orixe y, penriba too, deprender faciendo”.

En cada ‘Plastic Crowds’ va proponese un tema únicu nel qu’artistes visuales, historiadores del arte, músicos o arquiteutos van reflexonar y trabayar “en xunto, buscando proyeutos en collaboración”. Asina, pal debú de la revista l’asuntu a tratar son les burbuyes culturales, como’l Centru Niemeyer, el Calatrava, la Llaboral o la Cidade da Cultura de Galicia, tan d’actualidá anguaño. “La espublización entendémosla como un comisariáu o esposición en que, a partir del analís de los conteníos resultantes, constrúise’l discursu y el camín de la revista. Ye polo que dicimos que consta de presentación, ñudo y desenllaz, como puesta n’escena del discursu xeneral”, rellaten dende Plastic Crowds.

Nel númberu 1 de la revista collaboren los miembros del coleutivu Eva Yarza, Marta Yarza, Manuel Beltrán, Manuel Martínez, Braulio Iglesias, Manuel Pascual, Silvia Penas, Daniel Ramos, Ánxel Nava, 3D Neighbours, Pam Pam Liu, Pim A. van der Heiden, Kevin LCK, Sonia Barciela, Pedro Cárcamo, NAN Arquitectos, Marta Casadevalls, Santiago Paredes y Alician Durbas, amás de José Luis Pardo y Jorge Luis Marzo como convidaos. L’artista asturianu Ánxel Nava participa col artículu ‘Burbuyes culturales. Teoría del argayu’, escritu en llingua asturiana. L’actu col que se va dar a conocer la espublización n’Asturies va tener llugar a les 20 hores en Lola Orato Espacio de Arte, asitiáu na cai Escura, númberu 9, d’Uviéu. Nél, les persones interesaes van poder mercar esti primer númberu de ‘Plastic Crowds’ al preciu de 20 euros.