Preséntase en Xixón el númberu 11 de la revista lliteraria Formientu

El Club La Nueva España de Xixón va acoyer esti xueves la presentación del númberu 11 de la revista de lliteratura d’autores mozos Formientu. La espublización ta anguaño a la venta al preciu de 6 euros nes llibreríes Paradiso y Ojanguren.

Esti númberu de Formientu destaca por ser el primeru d’una etapa nueva: la revista pasa a ser añal, pero amplía conteníos al pasar de 30 fueyes a 70. Tamién llenda les sos páxines a autores nacíos a partir del añu 1980, calteniendo la so filosofía de dar espaciu nes sos páxines a escritores mozos. Asina, nel exemplar 11 de la revista podemos atopar creaciones de Denis Soria, Vítor Suárez, Cristina Menéndez, Belarmino Álvarez, Noemí Rodríguez, Alfredo Huergo, Blanca Fernández, Daniel Fernández, Abel Aparicio, Xurde Álvarez, Ismael Carmona, Félix Iglesias, Xosé B. Álvarez, Laura Marcos y Andrés Astur, amás d’incorporar una crítica lliteraria firmada por Javier Cubero.

Otra novedá ye la incorporación de la seición ‘Cuando… yera un autor mozu’, dedicada a mostrar pieces de la primer etapa creativa  d’escritores clásicos o contemporáneos, que nesti primer númberu va tener a Pin de Pría, col so poema ‘Llibertá’, como protagonista. Les semeyes de Formientu tornen a ser obra d’Alejandro Ordiales, fotógrafu mozu de Llangréu.

L’actu de presentación de Formientu, que cuenta cola collaboración d’Iniciativa pol Asturianu y la Sociedá Cultural Xixonesa, va principiar a les 20 hores y va tener como sede el Club La Nueva España de Xixón, asitiáu na Plaza Monte Piedá, llugar qu’acoyera hasta hai poco la sala cultural de CaxAstur y, munchos años enantes, les oficines del Sporting. Inaciu Galán, direutor de la revista editada por Xareos! Xestión Cultural, va encargase de conducir un actu nel que dellos autores van proceder a lleer les sos creaciones. Amás de la presentación de Xixón, tán confirmaes otres en La Foz (17 d’abril), Corvera (2 de mayu), Madrid (4 de xunetu) y Bimenes (12 de xunetu), cola posibilidá d’ampliar esta llista en feches próximes.

Abiertu'l plazu pal númberu 12

Xareos! Xestión Cultural yá tien abiertu’l plazu pa unviar creaciones de cara al númberu 12 de Formientu. Nella van poder participar autores nacíos del añu 1980 p’alantre, qu’han de presentar los sos testos enantes del 15 de setiembre al traviés del corréu formientu@xareos.com.