Preséntase’l programa del I Seminariu “Llingua Clase y Sociedá”

L'historiador Rubén Vega García, el filólogu Xulio Viejo Fernández y l'historiador Rafael Rodríguez Valdés igüen el comité organizador d'esti alcuentru que, ente'l 27 y el 30 de marzu, va analizar el papel qu'ocupaben los idiomes nes rellaciones sociales a lo llargo del primer terciu del sieglu XX nel Estáu español.

Talo qu'escribiera'l sociollingüista Rafael Ninyoles "les llingües nin lluchen nin choquen: son los grupos sociales los d'entrar nuna rellación cooperativa o antagónica". Coles mesmes, filólogos y historiadores axúntense nesti alcuentru científicu col envís d'analizar la dimensión social d'ún de los elementos que caractericen al ser humanu: el llinguaxe que, dende un plantiamientu y un funcionamientu interdisciplinares y ensin arrenunciar a la perspeutiva comparada, quier afondar nesi papel social de les llingües. El contactu ente filólogos y historiadores, faciendo posible qu'unos y otros alderiquen, intercambien idees y espongan les sos últimes investigaciones, va ser una de les novedaes d'esti alcuentru que yá tien peslláu'l so programa y que quier facese tamién con "proyección social" col oxetivu de que la Universidá nun se caltenga al marxe de los alderiques y discutinios esistentes na sociedá.

L'alcuentru va entamar el llunes 27 de marzu a les 16:00 hores cola recepción d'asistentes y entrega de documentación, siendo a les 16.45 la primer mesa redonda " "Izquierda y derechos llingüísticos" cola participación d'Inaciu Llope y Manuel Fernández de la Cera. El debate "Sindicalismu y enseñu del asturianu" con Primitivo Abella (CC.OO.), Maximina Fernández (FETE -UXT) y Alberto Megido (SUATEA) va completar esta primer xornada.

El martes 28 de marzu tan previstes les ponencies Xulio Viejo (Universidá d'Uviéu) "El llinguaxe humanu: de la evolución natural al discursu social" Noemi González (Universidá d'Uviéu) "Lengua y clase social", Francisco Erice (Universidá d'Uviéu) con "Lengua y sociedad en los clásicos marxistas: sus aportaciones a la luz de la Sociolingüística actual" y Faustino Zapico, que va falar de "La concreción n'Asturies del Estáu lliberal español y les sos alternatives (1808-1898)".


Pal miércoles 29 de marzu Rafael Rodríguez Valdés va esponer "La ideoloxía llingüística del movimientu obreru n'Asturies d'entesieglos" y Pablo San Martín de la University of Leeds va dar la ponencia "Modernidá, Llingua y Rexonalismu na Asturies del primer terciu del sieglu XX" mientres que pela tarde Luis Benito García (Universidá d'Uviéu) tien preparada la conferencia "El demonio rojo. La representación de los obreros en la literatura burguesa y fascista" y Carme Hermida de la Universidade de Santiago va falar de "O galego: unha lingua de maiorias reivindicada por minorias".


La sesión de pieslle del xueves 30 de marzu incclúyese a Victor Manuel Santidrián de la Fundación 10 de marzo con "Lengua y movimiento obrero en Galicia" Antonio Rivera Blanco de la Universidad del País Vasco con "El primer socialismo vasco y las culturas territoriales de su entorno" Pere Gabriel de la Universitat Autónoma de Barcelona con "Cultura democrática, lenguaje político y lengua en Cataluña. ss. XIX-XX" y una mesa redonda baxo'l títulu "Asturianismu y movimientu obreru" con Lluis Xabel Álvarez (Fundador de Conceyu Bable) y Francisco Prado Alberdi (Dirixente de CC.OO. y del P.C.E. na Transición) moderada pol historiador Rubén Vega.