Preparen un homenaxe a Fierro Botas

Celebróse ayeri un primer conceyu, al qu'asistieron bien d'organizaciones y colectivos,pa preparar un homenaxe a la figura del desapaecíu cura y escritor Federico Fierro-Botas, que morrió'l 28 de xunu n' accidente de coche na ciudá rusa de Vladivostok. La iniciativa del homenaxe, que surdió de la Fundación Nueva Asturies, pretende axuntar a distintos colectivos culturales, sociales y políticos, asina que la convocatoria ta abierta a tamién a toles personas y asociaciones que quieran homenaxear a Federico Fierro Botas. Trátase nun principiu de facer dos actos, ún relixosu y otru laicu, d'homenaxe,y amás sofitar delles iniciatives pa caltener la memoria d'esti importante intelectual asturianista, ente lñes que rescamplen les que presentó'l diputáu d'Izquierda Xunida Francisco Javier Valledor, que consisten en pidir una cai en Xixón que lleve'l nome de Fierro Botas y el llevar una solicitú a la Xunta Xeneral del Principáu pa que se-y conceda a Fierro Botas la Medalla d'Asturies a títulu póstumu. De momentu tan na comisión organizadora de los actos, ente otros, el Coleutivu Manuel Fernández de Castro, la Sociedá Bíblica, antiguos alumnos de Fierro, sacerdotes xesuites, y los partíos PAS, IX y IAS.