Preparando’l camín pa les Europees

Yá va quedando menos pal 25 de mayu, xornada d’eleiciones pa escoyer a los diputaos que van ocupar los 54 escaños que correspueden al Estáu na Eurocámara. Tolos partíos anden anguaño en negociaciones pa zarrar les distintes candidatures.

Nel casu de les organizaciones asturianes, la única que paez qu’apuesta por dir en solitariu a les Europees ye Foro. La Comisión Direutiva de la organización liderada por Francisco Álvarez-Cascos, con representación na Xunta Xeneral y nel Congresu, tovía nun dio la so confirmación oficial, anque too apunta a que va presentar candidatura. Sicasí, la consecución d’un escañu nel Parllamentu Européu preséntase casi imposible pa Foro, dao que n’anteriores eleiciones p’algamar representación hebo que sumar más de 350.000 votos.

Ente les fuercies nacionalistes, la primera en mover ficha foi Andecha Astur al decantase por participar nuna coalición liderada por Euskal Herria Bildu y formada por organizaciones soberanistes d’izquierda de dellos territorios del Estáu. Ésta sería una especie de continuidá d’Iniciativa Internacionalista, candidatura promovida por Izquierda Castellana con Alfonso Sastre como candidatu que contó col sofitu de parte de la izquierda abertzale. Esta coalición sumó nel 2009 178.121 votos, un 1,14 por cientu del total, pero’l liderazgu d’EH Bildu paez que daría a la candidatura nueva’l puxu suficiente p’algamar representación na Eurocámara. De momento, poco se sabe de les formaciones que van participar de forma definitiva nesta coalición, anque sí se conoz qu’Esquerra Republicana de Catalunya (ERC) nun va participar nella.  

La intención d’Andecha dende un primer momentu foi la de promover una candidatura conxunta asturiana dientro de la coalición nueva, pa lo que caltuvo contautos con Conceyu Abiertu, Compromisu por Asturies, Izquierda Asturiana (IAS) y Izquierda Anticapitalista. La decisión de la militancia de Compromisu, anunciada hai una selmana, de sofitar y participar nel procesu constituyente de Podemos Asturies entendióse dende Andecha como una apuesta de la federación de partíos por una vía distinta a la propuesta, como dexó ver nun comunicáu firmáu pol so secretariu xeneral, Arturu Xosé Bermeyu. Dende Compromisu recuerden que Podemos nun ye nenguna candidatura a les Europees y que, a día de güei, la organización asturianista nun sofita nenguna, anque too paez indicar que la plataforma que tien como cara más visible al profesor universitariu Pablo Iglesias dará finalmente’l pasu d'acudir a la cita coles urnes dao l’apoyu popular que ta algamando en tol Estáu.

Nel Conceyu Xeneral previstu pal meudía del 15 de febreru nel llocal d'Andecha n'Uviéu, la militancia va votar la participación de la formación na coalición d'EH Bildu y tratará otres cuestiones importantes, como la llinia política de la organización, los estatutos y responsabilidaes. Nel casu de que s’apruebe dir na coalición promovida dende Euskal Herria, Andecha va siguir apostando “por una candidatura xunitaria a les eleiciones europees”, como espuso Bermeyu nel comunicáu. Nella ye posible que tome parte Conceyu Abiertu, formación que tien previsto aconceyar esta selmana con representantes de les CUP catalanes y d’EH Bildu, una decisión que va tomar la so militancia nun Conceyu Nacional a celebrar en feches próximes. Como yá anunciara’l so coordinador nacional, Mariu Arbesú, n’Asturies.com, la plataforma d’eleutores refuga dir en solitariu a les Europees y namái considera dos escenarios: nun presentase, dando llibertá a la so militancia p’apoyar a dalguna candidatura, o facelo en coalición con otres fuercies soberanistes d’izquierda.

Pela so parte, IAS ta anguaño aldericando sobre les distintes posibilidaes que manexa de cara a la cita coles urnes del 25 de mayu. Esta formación ta considerando presentase o non, anque lo que tien nidio ye que nunca lo fadría en solitario. Nel casu de dar el pasu pa conformar parte d’una coalición, los militantes d’IAS van valorar, enantes que cualquier otra cosa, el programa que se presente con respeuto a la Xunión Europea y el procesu d’integración européu.

Una formación que yá tien decidido nun  presentase ye’l Partíu Asturianista (PAS), que participó per vegada última nunes Europées nel añu 2004 na Coalición Europea xunto con Coalición Canaria, el PAR y el Partido Andalucista (PA), ente otros. Nes del 2009, los partíos asturianos que se presentaron foron Unidá Nacionalista Asturiana (UNA) y Andecha Astur, dambos en solitariu, que sumaron 3.183 y 2.255 votos, de manera respeutiva, amás del Bloque por Asturies, integráu na coalición La Izquierda xunto con Izquierda Xunida, que consiguió dos escaños.

Los resultaos del 2009 y el movimientu d'ERC

Nel Parllamentu Européu hai anguaño seis partíos o coaliciones con representación por parte del Estáu español. Éstos son el PP (23 escaños); el PSOE (21); Coalición por Europa, integrada por CiU, PNV, CC y el PA, ente otros (2); La Izquierda (2); UPyD (1); y Europa de los Pueblos-Verdes (1), na que participen ERC, BNG, Aralar, EA y la Chunta Aragonesista, entre otros. El movimientu más destacáu hasta la fecha ye la decisión d’ERC d’apostar por una vía catalana, refugando la opción de repetir col BNG o d’axuntase a la propuesta d’EH Bildu. Mientres, el restu de partíos anden en negociaciones.