Premiu negativu pa la viceconseyera de Mediu Ambiente

La Coordinadora Ecoloxista d'Asturies entregó esti miércoles 28 d'avientu, día de los inocentes, el premiu "buyada purpurina 2005" que la organización lleva repartiendo dende va 13 años ente les persones y entidaes que más fixeron contra'l mediu ambiente n'Asturies. Ente la riestra de candidatos que s'escoyeron esti añu y na que taben Río Narcea Gold Mines o'l Presidente del Principáu d'Asturies ente otros, la Coordinadora apautó da-y el premiu a la viceconseyera de Mediu Ambiente del Gobiernu asturianu, Belén Fernández.


Ente los méritos que la fixeron merecedora del premiu negativu, los representantes de la Coordinadora estimaron la so defensa del proyectu pal embalse de Caliao (Casu) en Parque de Redes "ello con existir otres alternatives menos dañibles pal mediu ambiente que garanticen el serviciu d'agua" neto qu'asocede cola so defensa de la incineradora de basura que quier asitiar Cogersa en Serín (Xixón). Los ecoloxistes acúsenla tamién de "dexación de funciones" dende'l so cargu al consentir cola recalificación de suelu rural que va llevar al estrozu de la costa asturiana, amenazada por convenios urbanísticos". El dexar que la empresa Río Narcea construyere un banzáu de basa contaminante ensin permisos llegales ye otra de les culpes qu'echen los ecoloxistes en cargu de la viceconseyera, siendo otres d'elles el consentir cola mala calidá del aire que se respira nes ciudaes asturianes, l'alendar la construcción masiva de campos de golf, l'ataque urbanísticu sobre los montes cola creación d'estaciones d'esquí o l'aplaudir les "barbaridaes" que propón el Gobiernu asturianu como les llinies d'alta tensión.

La permala xestión que-y abulta al grupu ecoloxista que ta faciendo la titular de la viceconseyería incluyiría tamién l'incumplimientu de la Convención Aarhus, al nun dexar que participaren asociaciones ambientalistes y de vecinos na creación de planes ambientales y d'ordenación.