Premiu Nacional d'Educación pa un estudiu sobre integración d’inmigrantes na escuela asturiana

Ún de los retos que se-y planteguen a cualquier sociedá moderna, y l'asturiana nun ye una escepción, ye'l de ser a integrar los aportes d'inmigrantes que-y llegue. El sistema educativu ye ún de los preseos más importantes pa qu'estos nuevos ciudadanos, y sobremanera les sos nueves xeneraciones, s'integren ente nosotros, y asina lo reconoció'l tribunal del Premiu Nacional d'Investigación Educativa del Ministeriu d'Educación, que reconoció col segundu premiu un trabayu de profesores asturianos sobre integración de neños inmigrantes na escuela.

La obra premiada "La integración social y educativa del alumnáu inmigrante n'Asturies. Un estudiu de casu" ye un trabayu d'investigación sobre la integración na escuela asturiana de neños inmigrantes. Los sos responsables son la profesora de secundaria María Louzao Suárez, que desarrolla'l so llabor profesional en Burgos, y el profesor de la Universidá d'Uviéu Xosé Antón González Riaño, que comentó a Asturies.com dellos aspectos sobre esti estudiu.

Garrando como referencia'l cursu educativu 2003-2004, nel que'l sistema educativu asturianu tuvo matriculaos un total de 2.800 neños y neñes inmigrantes matriculaos, los profesores centráronse na escuela Menéndez Pelayo d'Uviéu, un centru nel que de 236 estudiantes, 91 d'ellos yeren inmigrantes -el 40% de la matrícula de la escuela-. Sobre esta muestra, los investigadores estudiaron aspectos mui distintos, dende la capacidá d'integración d'estos neños nel aula y de les sos families na comunidá educativa como les sos necesidaes educatives específiques.

L'estudiu rescampla delles cifres interesantes sobre la presencia d'escolinos inmigrantes na escuela asturiana, y asina mientres la media española d'estudiantes inmigrantes nes escueles anda pel 6,5% n'Asturies nun llega al 3,5%, cifra qu'espeya tamién la baxa incidencia del fenómenu inmigratoriu n'Asturies en rellación a otres comunidaes autónomes, anque como alvierten los responsables del estudiu, la presencia d'inmigrantes nun va facer otro que xubir y "ye importante que la escuela asturiana se prepare p'atender les necesidaes educatives d'estos colectivos, que van tener una presencia cada vegada mayor tanto nos centros educativos del centru d'Asturies y les ciudaes como nes ales y na escuela rural" según apunta González Riaño.

Una de les cifres que más llamen l'atención nel estudiu ye que'l 80 por cientu d'estos neños inmigrantes tan en centros de la rede pública, mientres que la privada concertada namás tien al 20% d'estos estudiantes, una situación que nun-y presta n'absoluto al profesor González Riaño, que cree que los alumnos con necesidaes educatives especiales tendríen de repartise de manera más igualada ente les dos redes y que camienta que la rede privada-concertada "discrimina a costafecha a los alumnos con necesidaes d'educación especial con vistes a nun perder un determináu perfil d'escolín".

No tocante a les particularidaes que presenta la integración del colectivu d'escolinos inmigrantes, munches d'elles derívense de la situación económica de les sos families y de la difícil vida d'un colectivu que carez problemes de vivienda, con families nes qu'en dellos casos refuguen tan siquiera a apaecer pel centru d'estudios por mieu a que puean derivase d'ello problemes por nun tener regularizada la so situación nel Estáu español. Otramiente l'estudiu llama l'atención sobre'l fechu de como, con ser el 80% de los estudiantes inmigrantes procedentes de países de fala hispana, ye precisamente la barrera idiomática una de les qu'han de superar nel so primer añu de convivencia n'España, dalgo que pal profesor González Riaño ye una de les amueses qu'espeyen "lo falso del mitu de la unidá del español". D'otra manera, los estudiantes d'otres procedencies, que son mui bien recibíos polos sos compañeros d'escuela, demuestren un altu interés por integrase na cultura que los acueye, con una participación mui activa nos temes de cultura y llingua asturianes.